ОСЛО, 27 октябрь. /“Дунё” АА/. Норвегияда барқарор ривожланиш, инновациялар ва ахборот технологиялари соҳасидаги ҳамкорлик истиқболларига бағишланган биринчи Норвегия-ўзбек бизнес-форуми бўлиб ўтди, деб хабар бермоқда “Дунё” АА мухбири.

Мазкур тадбир Ўзбекистоннинг Стокгольм шаҳрида жойлашган элчихонаси томонидан Норвегия кичик ва ўрта бизнес ассоциацияси (“SME Norway”) билан ҳамкорликда мамлакатимиз делегацияси иштирокида ташкил этилди.

Форумда Ўзбекистон элчиси Раҳматулла Нуримбетов, рақамли технологиялар вазири маслаҳатчиси Акахиро Сакураи, “SME Norway” президенти Юсуф Гилани ва Норвегия тадбиркорлар ассоциацияси раҳбари Эйвинд Скаре қатнашиб, қутлов сўзлари билан қатнашдилар.

Анжуман давомида иштирокчилар Ўзбекистоннинг рақамли иқтисодиётини ривожлантириш, IT-хизматлар экспорт ҳажмини ошириш, технологик компаниялар учун инфратузилма яратиш ҳамда аутсорсинг йўналишида ҳамкорлик қилиш имкониятларини муҳокама қилдилар. Тадбирда “IT Park”, шунингдек, Самарқанд ва Жиззах вилоятлари вакиллари мамлакатимизнинг салоҳияти ҳамда қўшма инновацион лойиҳаларни амалга ошириш истиқболларини тақдим этдилар.

Юсуф Гилани Ўзбекистонда амалга оширилаётган ислоҳотлар ва хорижий инвесторлар учун яратилган шароитларни юқори баҳолаб, норвегиялик компанияларни ўзбек бозорига фаол кириб боришга чақирди. Шунингдек, иштирокчиларга “Янги Тошкент” мегалойиҳасининг инфратузилмавий ташаббуслари таништирилди.

Ўзбекистондан “Talenthub”, “Z Mile”, “Global Outsourcing Partners” ва “World Mmm”, шунингдек, Норвегиянинг “Resilienza Holding AS” ва “Sensoeconomic” компаниялари ўз тақдимотлари билан иштирок этдилар. Форум доирасида икки томонлама B2B учрашувлари ўтказилди.

Учрашув якунлари бўйича “Volür”, “Mesh Youngstorget AS”, “Viznor”, “Qualcomm Tech”, “UzNord Import AS” компаниялари ҳамда “SME Norway” ассоциацияси билан сунъий интеллектни озиқ-овқат саноатида қўллаш, стартапларни қўллаб-қувватлаш, ўзбекистонлик мутахассисларни иш билан таъминлаш ва ўзаро бизнес-миссияларни ташкил этиш соҳаларида келишувларга эришилди.