МАРИБОР, 13 июнь. /“Дунё” АА/. Словенияда халқаро иқтисодий ҳамкорлик, ташқи савдо ва инвестицияларни жалб қилиш масалалари бўйича халқаро форум бўлиб ўтди, деб хабар бермоқда “Дунё” АА мухбири.

Марибор шаҳрида бўлиб ўтган форумда Ўзбекистоннинг савдо-иқтисодий ва инвестициявий салоҳиятига бағишланган тақдимот ўтказилди. Иштирокчиларга мамлакатимизда амалга оширилаётган иқтисодий ислоҳотлар, инвестиция муҳитини яхшилаш чора-тадбирлари ҳамда европалик ҳамкорлар билан ҳамкорликни кенгайтириш истиқболлари ҳақида маълумот берилди.

Тадбир доирасида Ўзбекистоннинг Словениядаги элчиси (қароргоҳи Будапештда) Ойбек Шахавдинов давлат органлари, ишбилармон ва илмий доиралари вакиллари билан учрашув ўтказди. Музокаралар чоғида инновациялар, геология, рақамли технологиялар, экология ва илмий тадқиқотлар соҳаларида ҳамкорлик истиқболлари муҳокама қилинди.

Ўтказилган учрашувларда Словения расмий ва ишбилармон доираларининг Ўзбекистон билан ўзаро манфаатли ҳамкорликни янада ривожлантиришга қизиқиши ортиб бораётганидан далолат экани таъкидланди.

Шунингдек, Словения ишбилармонларидан иборат делегациянинг 2026 йил октябрь ойида Ўзбекистонга ташрифини ташкил этиш ҳамда уни “InnoWeek–2026” халқаро инновациялар ҳафталиги билан мувофиқлаштириш бўйича дастлабки келишувларга эришилди.