СИНГАПУР, 16 май. /“Дунё” АА/. Ўзбекистонлик 20 нафардан ортиқ тадбиркор аёл Сингапурдаги бизнес-миссиясида иштирок этди, деб хабар бермоқда “Дунё” АА мухбири.

Мазкур сафар “Hamroh” компанияси кўмагида ташкил этилди. Миссия давомида делегация “WEConnect International APAC Summit 2026” форумида қатнашди, шунингдек, Сингапур, Австралия ва бошқа мамлакатлар компаниялари вакиллари билан икки томонлама музокаралар ўтказди.

Учрашувлар чоғида аёллар тадбиркорлигини ривожлантириш, халқаро бозорларга чиқиш имкониятларини кенгайтириш ҳамда корпоратив харидлар тизимларида иштирок этиш масалалари муҳокама қилинди.

Шунингдек, “Hamroh” компанияси ва “WEConnect International” халқаро нотижорат ташкилоти ўртасида аёллар тадбиркорлигини ривожлантиришга қаратилган ҳамкорлик тўғрисидаги битим имзоланди. Ҳужжатда ўзбекистонлик тадбиркор аёллар учун халқаро WБЕ сертификатини олиш, бизнес кўникмаларини ривожлантириш ва янги бозорларга чиқиш каби имкониятларни кенгайтириш кўзда тутилган.

Таъкидланишича, ушбу ҳамкорлик натижасида “Hamroh” компанияси “WEConnect International”нинг Марказий Осиёдаги хабига айланади ва бу аёллар тадбиркорлигини минтақавий даражада ривожлантириш учун янги имкониятлар яратади.