БРЮССЕЛЬ, 18 август. /“Дунё” АА/. Бельгиянинг Валлония минтақасидаги 15 та коммунада кучли қурғоқчилик ва ер ости сувлари сатҳи рекорд даражада пасайиб кетгани сабабли сувдан фойдаланишга чекловлар жорий этилди, деб хабар бермоқда “Дунё” АА мухбири “The Brussels Times” янгиликлар порталига таяниб.

Аҳолига экинларни суғориш, бассейн ва бошқа сув ҳавзаларини тўлдириш учун сув ишлатиш тақиқланмоқда. Чекловлар дарёларнинг тез саёзлашиб бораётгани ва узоқ давом этаётган аномал жазирама туфайли жорий қилинган.

Маас, Шелда ва Самбра каби йирик дарёлар шлюзлар ёпилгани туфайли кемалар қатнови учун минимал сув сатҳини сақлаб қолаётган бўлса-да, бу кемалар ҳаракатида кечикишларга сабаб бўлмоқда. Кичикроқ дарёлар айрим жойларда аллақачон қуриб бўлган, ўнлаб қайиқ станциялари эса сув танқислиги туфайли ўз фаолиятини тўхтатган.

Бельгия Қироллик метеорология институти маълум қилишича, ҳозирги қурғоқчилик 1970 йилда кузатувлар бошланганидан буён кузатилган энг кучли иккинчи қурғоқчилик бўлиб, яқин кунларда янги рекорд ўрнатиши мумкин.

Июль ойида ўртача ёғингарчилик миқдори 100 мм атрофида бўлишига қарамай, бор-йўғи 10 мм дан сал кўпроқ ёғин тушган, июль ва август ойларида эса кундузги ҳарорат кўпинча 35–36 даражадан ошиб кетган.

Экстремал об-ҳаво ҳодисалари Европа учун тобора жиддий молиявий муаммога айланиб бормоқда. Европа атроф-муҳит агентлиги маълумотларига кўра, 1980–2024 йилларда иқлим ва об-ҳаво билан боғлиқ офатлар Европа Иттифоқига тахминан 822 миллиард евро миқдорида зарар етказган, бу сумманинг қарийб чорак қисми сўнгги тўрт йил ҳиссасига тўғри келади.

Шу билан бирга, Европа Иттифоқидаги иқлим билан боғлиқ зарарнинг атиги тўртдан бир қисми суғурталанган. Мутахассислар қурғоқчилик, сув тошқинлари ва ўрмон ёнғинларининг тез-тез содир бўлиши давлат бюджетларига тушадиган юкламани оширишидан огоҳлантирмоқда.

Рекорд даражадаги жазирама ва узоқ давом этган қурғоқчилик фонида Испания, Франция, Португалия, Греция ва бошқа мамлакатларда ўрмон ёнғинлари давом этмоқда. Еврокомиссиянинг хабар беришича, 17 август ҳолатига Европада йил бошидан буён 600,5 минг гектарга яқин майдон ёниб кетган, бу сўнгги 20 йилдаги ўртача кўрсаткичдан анча юқоридир.

Сўнгги ёнғинлар инсонлар ўлимига ҳам сабаб бўлди: Грециянинг Саламин оролида икки киши, Испанияда эса ёнғинни ўчириш вақтида бир ҳарбий хизматчи ҳалок бўлди. Айни пайтда бутун Европа бўйлаб ёнғинлар оқибатида ҳалок бўлганларнинг аниқ умумий сони ҳали аниқланмаган. Чунки турли мамлакатларнинг маълумотлари турлича даврийликда янгиланади.

Эслатиб ўтамиз, Ғарбий Европа кузатувлар тарихидаги энг иссиқ июнь–июль даврини бошдан кечирди. Экстремал жазирама ва қурғоқчилик эса кенг кўламли ёнғинлар ҳамда дарёлар сатҳининг пасайишига олиб келган омиллардан бири бўлди. Июнь ойининг иккинчи ярмида Ғарбий Европани қамраб олган жазирама камида 12 минг кишининг бевақт ўлимига сабаб бўлган.