ГУАНЧЖОУ, 18 март. /“Дунё” АА/. Мамлакатимиз Бош консулхонаси томонидан Ўзбекистоннинг туризм имкониятларини кенг тарғиб этишга бағишланган навбатдаги бизнес-форум ташкил этилди, деб хабар бермоқда “Дунё” АА мухбири.

Тадбирда Хитойнинг жанубий ҳудудларида фаолият юритувчи 40 дан ортиқ йирик сайёҳлик компаниялари ва соҳа экспертлари иштирок этди.

Форум давомида иштирокчиларга Самарқанд, Бухоро ва Хива каби тарихий шаҳарларнинг бой маданий мероси, замонавий сайёҳлик инфратузилмаси ҳамда янги йўналишлар бўйича истиқболли лойиҳалар тақдим этилди. Хитойлик ишбилармонлар Ўзбекистоннинг бой тарихи ва ЮНЕСКОнинг Жаҳон мероси объектлари рўйхатига киритилган обидаларига катта қизиқиш билдирди.

Мулоқот чоғида Тошкент ва Гуанчжоу шаҳарлари ўртасида ҳафтасига 10 та тўғридан-тўғри авиарейслар йўлга қўйилгани ҳамда бир ойлик визасиз режимнинг амал қилиши икки давлат ўртасидаги сайёҳлар оқимини кескин оширишга хизмат қилаётгани алоҳида эътироф этилди.

“SilkLink” компанияси бош директори Дай Донгмэй таъкидлаганидек, “Ўзбекистон бугунги кунда дунёдаги энг жозибадор туристик йўналишлардан бирига айланди. Мақсадимиз – ўзаро ҳамкорликни кучайтириш ва янги маркетинг кампаниялари орқали хитойлик сайёҳлар учун Буюк Ипак йўлининг ноёб меросини кашф этишдир”.

Тадбир якунида хитойлик туроператорлар билан янги қўшма йўналишларни ишлаб чиқиш ва Ўзбекистоннинг туристик брендини кенг тарғиб қилиш бўйича келишувларга эришилди.