МАДРИД, 19 январь. /“Дунё” АА/. Кеча кечқурун Испаниянинг Кордова шаҳри яқинида иккита тезюрар поезд иштирокида жиддий темир йўл ҳалокати содир бўлди, деб хабар бермоқда “Дунё” АА мухбири Испания ОАВларига таяниб.

Расмий маълумотларга кўра, Италиянинг “Iryo” компаниясининг Малага–Мадрид йўналишида ҳаракатланаётган поезд Адамус станциясига кираверишда стрелкали ўтказгичда рельсдан чиқиб кетган. Ўша пайтда вагонлардан бири Мадриддан Уэлва провинциясига кетаётган “Renfe” компанияси поезди ҳаракатланаётган қўшни йўлда пайдо бўлади. Натижада, тўқнашув содир бўлиб, иккинчи таркиб ҳам издан чиққан.

Ҳалокатга учраган поездларда 500 нафарга яқин одам бўлган.

Испания фуқаролик гвардиясининг сўнгги маълумотларига кўра, ҳалокат оқибатида 39 киши ҳалок бўлган, камида 152 киши жароҳатланган, улардан 24 нафари оғир аҳволда. Воқеа жойида фавқулодда хизматлар ўз ишини давом эттирмоқда.

Испания транспорт вазири Оскар Пуэнте содир бўлган воқеани “ўта оғир ҳодиса” деб атади. Бош вазир Педро Санчес фожиа муносабати билан мухолифат етакчиси Альберто Нуньес Фейхоо билан режалаштирилган учрашувни қолдирди.

Ҳалок бўлганларнинг оилаларига Европа институтлари вакиллари ҳамдардлик билдирди. Еврокомиссия раҳбари Урсула фон дер Ляйен “Кордовадан келган янгиликлардан қаттиқ таъсирланганини” айтди ва жабрланганларга тезроқ соғайиб кетишни тилади.

Ҳалокат сабаблари текширилмоқда.

Испанияда уч кунлик мотам эълон қилинди.

“Reuters” АА сурати