РИМ, 1 август. /“Дунё” АА/. Италиянинг Неаполь шаҳри яқинида жойлашган Кампи-Флегрей вулқон ҳудудида кеча 4,7 магнитудали зилзила содир бўлди, деб хабар бермоқда “Дунё” АА мухбири.

Россиянинг “РБК” портали маълумотига кўра, ерости силкинишлари минтақада сўнгги ўн йилликларда қайд этилган энг кучли зилзилалардан бири бўлган. Зилзила маркази тахминан 3 километр чуқурликда жойлашган бўлиб, асосий силкинишдан сўнг бир қатор афтершоклар ҳам кузатилган.

Дастлабки маълумотларга кўра, табиий офат оқибатида 21 нафар киши жабрланган, улардан икки нафари оғир тан жароҳати олган. Шунингдек, айрим турар-жой бинолари ва инфратузилма объектларига зарар етган. Хавфсизлик нуқтаи назаридан энг кўп зарар кўрган ҳудудларда транспорт ҳаракати вақтинча чекланиб, биноларнинг техник ҳолатини ўрганиш ишлари бошланган.

Мутахассислар қайд этишича, Кампи-Флегрей Европадаги энг фаол вулқон ҳудудларидан бири ҳисобланади. Айни пайтда сейсмик вазият доимий назорат остида бўлиб, олимлар эҳтимолий геологик жараёнларни баҳолашни давом эттирмоқда.