ТОКИО, 28 июнь. /“Дунё” АА/. Бугун Япониянинг жанубий қисмидаги Кюсю оролида жойлашган Кумамото префектурасида 7,1 магнитудали кучли зилзила содир бўлди, деб хабар қилмоқда “Дунё” АА мухбири.

“Kyodo News” агентлигининг хабар беришича, зилзила ортидан ҳудудда цунами хавфи эълон қилиниб, аҳолига эҳтиёт чораларини кўриш бўйича огоҳлантиришлар берилди.

Япония Метеорология агентлиги маълумотларига кўра, зилзиланинг эпицентри Кумамото префектураси ҳудудида, тахминан 10 километр чуқурликда жойлашган. Зилзиладан сўнг ҳудудда 5 баллгача бўлган такрорий тебранишлар – афтершоклар кузатилган.

Маълумотларга кўра, зилзиладан кейин Кумамото префектурасида 48 мингдан ортиқ хонадон электр таъминотисиз қолган. Компания аҳолини узилган электр симларига яқинлашмасликка ва аниқланган носозликлар ҳақида хабар беришга чақирди.

Зилзиладан сўнг Ариаке ва Яцуширо денгизлари соҳиллари учун цунами хавфи ҳақида огоҳлантириш берилди. Расмийлар баландлиги тахминан 1 метргача бўлган тўлқинлар келиши мумкинлигини маълум қилиб, аҳолини соҳил ҳудудларидан узоқлашишга чақирди.

Фавқулодда вазият муносабати билан Кумамото, Нагасаки, Кагосима, Фукуока, Сага, Оита ва Миядзаки префектураларида зилзила бўйича огоҳлантириш чоралари кучайтирилди. Бу ҳудудларнинг барчаси Кюсю оролида жойлашган.

Зилзила оқибатида бир неча киши жароҳат олгани хабар қилинди. Кумамото префектурасининг Уки шаҳрида бир нечта ёнғинлар қайд этилган, фавқулодда хизматларга қўнғироқлар сони кескин ошган. “NHK” телеканали эфирларида зилзила марказига яқин ҳудудларда айрим биноларга зарар етгани кўрсатилди.

Табиий офат сабабли транспорт тизимида ҳам вақтинчалик ўзгаришлар юз берди. “JR Kyushu” темирйўл компанияси хавфсизлик текширувлари ўтказиш мақсадида поездлар ҳаракатини вақтинча тўхтатди.

Япония бош вазири Санаэ Такаичи аҳолини эҳтимолий янги кучли силкинишларга тайёр туришга чақирди. Ҳукумат зилзила оқибатларини баҳолаш ва зарар кўрган ҳудудларга ёрдам кўрсатиш ишларини бошлаган.