САНКТ-ПЕТЕРБУРГ, 11 ноябрь. /“Дунё” АА/. Санкт-Петербургда миллий кураш бўйича кўргазмали турнир бўлиб ўтди, деб хабар бермоқда “Дунё” АА мухбири.

Енгил атлетика академиясида ўтказилган мазкур тадбир Ўзбекистоннинг Санкт-Петербургдаги Бош консулхонаси ташаббуси билан Россия кураш федерациясининг Санкт-Петербург ва Ленинград вилояти кенгаши раиси Равшанбек Қурбонов ҳамкорлигида ташкил этилди.

Мусобақада 50 дан ортиқ киши, жумладан, профессионал спортчилар, мураббийлар, талабалар ва яккакураш ишқибозлари иштирок этди. Халқаро кураш институти ҳамда Ўзбекистон кураш федерациясининг услубий ва моддий кўмагида иштирокчилар анъанавий спорт либоси – яхтак билан таъминланди.

Меҳмонлар ва иштирокчилар турнирнинг юқори савияда ташкил этилганини эътироф этиб, бундай тадбирларда мунтазам қатнашишга тайёр эканликларини билдирдилар.

Мусобақа давомида спортчиларни тизимли тайёрлаш ва миллий спорт турини минтақада янада оммалаштириш мақсадида Бош консулхона томонидан Санкт-Петербургда ихтисослаштирилган кураш секциясини очиш имконияти кўриб чиқилди.