СТОКГОЛЬМ, 15 май. /“Дунё” АА/. Ўзбекистоннинг Швециядаги элчихонаси ташаббуси билан Ўзбекистон “Савдони ривожлантириш компанияси” АЖ бошчилигидаги делегациянинг Стокгольм шаҳрига хизмат сафари ташкил этилди, деб хабар қилмоқда “Дунё” АА мухбири.

Амалга оширилган ташрифда делегация таркибидан йигирмага яқин экспортчи корхоналар вакилларидан иборат ишбилармонлар ўрин олди.

Ташриф доирасида Стокгольм шаҳридаги “Norrsken House” бизнес-марказида “Ўзбекистон–Швеция савдо ҳамкорлиги: имкониятлар ва истиқболлар” мавзусида давра суҳбати бўлиб ўтди.

Учрашувда Швеция Ташқи ишлар вазирлиги, Евросиё бўйича савдо палатаси, Миллий савдо кенгаши, Экспорт-кредит агентлиги ҳамда 30 га яқин швед ва норвегиялик импортчилар ва дистрибюторлар иштирок этди.

Мулоқот жараёнида Ўзбекистоннинг экспорт салоҳияти, Швеция бозори имкониятлари ҳамда маҳаллий маҳсулотларни Скандинавия мамлакатларига экспорт қилиш механизмлари муҳокама қилинди. Шунингдек, ҳўл ва қуруқ мевалар, электротехника, кимё ва қурилиш маҳсулотларини етказиб бериш бўйича B2B шаклида музокаралар ўтказилди.

Музокаралар чоғида Ўзбекистон “Савдони ривожлантириш компанияси” АЖ ҳамда Швеция Миллий савдо кенгаши ўртасида экспортчилар учун Швеция бозорига киришга бағишланган ўқув курсларини ташкил этиш бўйича келишувга эришилди.

Делегация, шунингдек, “Stockholmsmässan” кўргазма мажмуаси ва “Westfield Mall of Scandinavia” савдо комплекси фаолияти билан танишди.

Сафар давомида жорий йил кузида “Made in Uzbekistan” кўргазмасини ўтказиш ва Ўзбекистон маҳсулотлари учун савдо уйини ташкил этиш бўйича дастлабки келишувларга эришилди.