ОСАКА, 10 ноябрь. /“Дунё” АА/. Ўзбекистон элчихонаси дипломатлари Осака шаҳрига ташрифи доирасида “Nankai Travel International” компанияси президенти Ясухито Киёхара билан учрашди, деб хабар бермоқда “Дунё” АА мухбири.

Мулоқот давомида Ўзбекистоннинг туристик салоҳияти, япон сайёҳлари учун янги туристик маҳсулотларни ишлаб чиқиш ҳамда икки мамлакат ўртасида туризм соҳасидаги ҳамкорликни кенгайтириш масалалари муҳокама қилинди.

Компания президенти 2024 йилда Осака шаҳридаги 10 дан ортиқ кичик ва ўрта бизнес вакиллари учун Ўзбекистонга бизнес-саёҳат ташкил этилганини қайд этиб, мамлакатимизга нисбатан қизиқиш ортиб бораётганини таъкидлади.

Компания Ўзбекистон йўналишида индивидуал саёҳатлар ва таълим туризмига мўлжалланган янги туристик пакетларни ишлаб чиқишдан манфаатдор эканини билдирди.

Учрашув давомида 2027 йилда Самарқанд ва Нара шаҳарлари ўртасида биродарлик алоқалари ўрнатилганининг беш йиллиги муносабати билан Нара аҳолиси учун Ўзбекистонга махсус туристик пакетлар ишлаб чиқиш ҳамда шаҳарда мамлакатимизнинг туристик имкониятларига бағишланган тақдимот ўтказишга келишиб олинди.

Шунингдек, Осака ҳудудидаги мактаб ўқувчилари учун Ўзбекистонга таълим саёҳатларини ташкил этиш масалалари юзасидан ҳамкорликни ривожлантириш бўйича фикр-мулоҳаза алмашилди.

1950 йилда ташкил этилган Осакадаги “Nankai Travel International” компанияси ички ва халқаро туризм, гуруҳли ва индивидуал саёҳатларни ташкил этишга ихтисослашган. Ҳозирда компаниянинг Токио, Фукуока ва Вакаяма шаҳарларида ҳам ўз офислари мавжуд.