КИЕВ, 23 апрель. /“Дунё” АА/. Украин–Турк маркази директори, Украинанинг “FREEDOM” давлат телеканалининг “Туркий форум” дастури муаллифи ва бошловчиси Марина Гончарук “Дунё” ААга Ўзбекистон Президентининг 21–22 апрель кунлари Остонага амалий ташрифи якунларини ҳақида фикр билдирди:

– Ўзбекистон Президенти Шавкат Мирзиёевнинг Қозоғистон Президенти Қасим-Жомарт Тоқаевнинг таклифига биноан Остонада бўлиб ўтган Минтақавий экологик саммит ҳамда Оролни қутқариш халқаро жамғармаси таъсисчи давлатлари раҳбарлари кенгашининг йиғилишидаги иштироки Тошкентнинг изчил ва стратегик жиҳатдан пухта сиёсатини яққол акс эттиради.

Бу ерда гап шунчаки дипломатик иштирок ҳақида эмас, балки Марказий Осиёнинг барқарор ривожланиш кун тартиби шакллантириладиган ва бутун минтақа учун узоқ муддатли аҳамиятга эга қарорлар қабул қилинадиган муҳим форматларда мазмунли қатнашиш ҳақида бормоқда.

Бугунги кунда экологик муаммолар, жумладан, сув ресурслари ва иқлим ўзгариши масалалари Марказий Осиё мамлакатлари учун долзарб аҳамият касб этмоқда. Шу нуқтаи назардан, Ўзбекистоннинг трансчегаравий муаммоларни ҳал этиш бўйича аниқ ёндашувларни таклиф этиб, фаол ташаббускор ва бирлаштирувчи куч сифатида майдонга чиқаётгани айниқса муҳимдир. Саммит якунида минтақавий ҳамкорликни мустаҳкамлашга ва ўзаро келишилган ҳамкорлик механизмларини ишлаб чиқишга қаратилган муҳим ҳужжатлар қабул қилинди.

Бундай ташқи сиёсий фаоллик кенг кўламли ислоҳотлар дастурининг узвий қисми бўлиб, унинг доирасида очиқлик, модернизация ва яхши қўшничилик муносабатларини ривожлантиришга алоҳида эътибор қаратилмоқда. Қозоғистонга ташриф ва экологик ташаббуслардаги иштирок бу йўл нафақат мамлакат ичида, балки минтақавий даражада ҳам амалга оширилаётганидан далолат беради.

Шу билан бирга, Ўзбекистон жиддий экологик муаммоларга, биринчи навбатда, Орол инқирози оқибатлари билан боғлиқ қийинчиликларга дуч келаётганини таъкидлаш лозим. Бироқ, айнан шундай мураккаб шароитда мамлакат тизимли ва масъулиятли ёндашувни намоён этиб, Оролнинг қуриган тубида миллионлаб гектар майдонда ўрмонзорлар барпо этиш бўйича кенг кўламли лойиҳаларни амалга оширмоқда.

Шунингдек, сув ресурсларидан оқилона фойдаланиш бўйича ташаббуслар фаол илгари сурилмоқда ҳамда Оролни қутқариш халқаро жамғармаси доирасидаги халқаро ҳамкорлик мустаҳкамланмоқда. Шавкат Мирзиёев ташаббуси билан Оролбўйи минтақаси БМТ шафелигида экологик инновациялар ва технологиялар ҳудуди сифатида халқаро миқёсда тан олинди.

Кўп жиҳатдан айнан шундай саъй-ҳаракатлар туфайли Марказий Осиё бугунги кунда яхши қўшничилик ва умумий келажак учун биргаликдаги масъулият макони сифатида қабул қилинмоқда. Президент Шавкат Мирзиёевнинг изчил сиёсати минтақа мамлакатлари ўртасидаги ишончни мустаҳкамлашга ҳамда амалий ечимлар ва ўзаро қўллаб-қувватлашга асосланган ҳамкорликнинг янги моделини шакллантиришга хизмат қилмоқда.

Ишончим комилки, бундай ташаббуслар минтақа ҳудудидан ташқарида ҳам катта аҳамиятга эга. Улар гуманитар, маданий ва экспертлараро ҳамкорликни ўз ичига олган халқаро алоқаларни кенгайтириш учун мустаҳкам замин яратади ҳамда Марказий Осиё маконининг барқарор ривожланиши ва барқарорлигидан манфаатдор мамлакатлар ўртасидаги алоқаларни мустаҳкамлаш учун янги имкониятлар очади.