МОСКВА, 1 май. /“Дунё” АА/. Россия Фанлар академияси Шарқшунослик институти илмий ходими, Жамоатчилик дипломатияси ва жаҳон сиёсати таҳлили маркази директори, Халқаро ишлар бўйича кенгаши эксперти Александр Воробьёв “Дунё” ААга Чехия Бош вазири Андрей Бабишнинг 29–30 апрель кунлари Ўзбекистонга амалга оширган расмий ташрифи натижалари юзасидан фикр билдирди:

– Чехия Бош вазири Андрей Бабишнинг ушбу ташрифи Тошкентнинг кўп векторли ташқи сиёсат стратегиясида муҳим ўрин тутади. Чунки Ўзбекистон учун нафақат Европа Иттифоқи билан, балки алоҳида Европа давлатлари билан ҳам икки томонлама алоқаларни ривожлантириш муҳим аҳамиятга эга.

Чехия Шарқий Европадаги саноат ва иқтисодий жиҳатдан ривожланган давлатлардан бири бўлиб, икки давлат ўртасидаги ҳамкорлик янги иқтисодий имкониятлар эшигини очиши мумкин. Айниқса, инвестициялар, саноат кооперацияси ва технологиялар алмашинуви йўналишлари устувор аҳамият касб этади.

Ўзбекистон ва Чехия ўртасида иқтисодиёт, саноат, илмий-технологик ҳамкорлик, дипломатик кадрларни тайёрлаш, шунингдек, метрология лабораториясини биргаликда лойиҳалаштириш ва ташкил этиш, метрология соҳасидаги илмий-инновацион ҳамкорликни кенгайтириш истиқболли йўналишлардан ҳисобланади.

Икки давлат ўртасидаги алоқалар фақат савдо билан чекланиб қолмасдан, инновация ва технологик ҳамкорлик йўналишларида ҳам изчил кенгайиб бораётганини алоҳида таъкидлаш керак.

Фикримча, Чехия Бош вазирининг ташрифи Ўзбекистоннинг халқаро майдондаги иқтисодий мавқеини мустаҳкамлаш, янги инвесторларни жалб қилиш ва Европа бозори билан интеграцияни кучайтиришга хизмат қилади.