ДУБАЙ, 5 июль. /“Дунё” АА/. БААда фаолият юритаётган ўзбекистонлик тадбиркор Улуғбекхон Максумов томонидан юртимиздаги бир қатор техникумларга замонавий ўқув-амалий жиҳозлари ҳомийлик асосида тақдим этилди, деб хабар бермоқда “Дунё” АА мухбири.

Мазкур ташаббус Дубай шаҳридаги Бош консулхона кўмагида амалга оширилиб, дастлаб Ўзбекистондаги таълим муассасаларининг моддий-техник ҳолати ва эҳтиёжлари ўрганилди.

Шу асосда “INKAS” компанияси томонидан жами 20 дона компьютер, 10 дона принтер, 5 дона тикув машинаси ҳамда 5 дона нуқтали пайвандлаш аппарати ҳомийлик тариқасида ажратилди.

Самарқанд вилояти Каттақўрғон туманидаги 1- ва 2-сон техникумларга ҳар бири учун 10 тадан компьютер ва 5 тадан принтер, Бухоро вилояти Вобкент туманидаги 1-сон техникумига эса 5 дона тикув машинаси ҳамда 5 дона нуқтали пайвандлаш аппарати тақдим этилди.

Ташкилотчиларга кўра, бу каби ташаббуслар техникумларнинг моддий-техник базасини мустаҳкамлаш, ўқувчиларнинг амалий касбий тайёргарлигини ошириш, ёшларни замонавий касбларга йўналтириш ва уларнинг меҳнат бозоридаги рақобатбардошлигини юксалтиришга хизмат қилади.