ЛОНДОН, 30 сентябрь. /"Дунё" АА/. Ўзбекистон адлия вазири ўринбосари Музраф Икрамов бошчилигидаги мамлакатимиз делегацияси Буюк Британияга ташрифи доирасида бир қатор учрашувлар ўтказди ва ташкилотлар фаолияти билан танишди, деб хабар қилмоқда "Дунё" АА мухбири.

Хусусан, юртимиз делегацияси аъзолари Уэльснинг Ньюпорт шаҳрида Британия Интеллектуал мулк идораси бош директори Адам Уильямс билан музокаралар ўтказди.

Интеллектуал мулк объектларини тижоратлаштириш учун Буюк Британияда амалга оширилаётган ишлар, жумладан, интеллектуал мулкдан фойдаланишни ўргатишга, қўшимча даромад олишга, контрафакт маҳсулотларга қарши курашишга қаратилган "IP partners", "IP Access", "IP healthcare" каби лойиҳаларни Ўзбекистонда амалга ошириш истиқболлари муҳокама қилинди.

Шунингдек, Лондон полиция бўлинмаси билан ҳамкорликда ҳуқуқ эгасига етказилган зарарни аниқлаш бўйича семинар ташкил этилди. Унда Ўзбекистон Республикасининг 2022-2026-йилларга мўлжалланган интеллектуал мулк стратегиясини 2027-2030 йилларда давом эттириш бўйича таклифларни биргаликда ишлаб чиқиш каби қўшма лойиҳаларни амалга ошириш хусусида фикр алмашилди.

Бундан ташқари, Ўзбекистон вакиллари Буюк Британия бозорида аниқланган контрафакт маҳсулотлар кўргазмаси ва контрафакт маҳсулотлар айланмасига қарши курашиш бўйича Лондон полиция бўлинмаси фаолияти билан танишди.