ТОШКЕНТ, 29 июль. /"Дунё" АА/. "Беларусь – Россия – Қозоғистон – Ўзбекистон – Афғонистон – Покистон" мультимодал транспорт коридорини ривожлантириш бўйича ишчи гуруҳнинг онлайн йиғилиши бўлиб ўтди, деб хабар қиляпти "Дунё" АА мухбири.

Ўзбекистон транспорт вазирлиги маълумотига кўра, транспорт вазири ўринбосари Жасурбек Чориев иштирок этган йиғилишда янги мультимодал транспорт коридори орқали юк ташувларини ривожлантириш билан боғлиқ масалалар муҳокама қилинди.

Томонлар ҳар бир давлат ҳудуди орқали ўтувчи халқаро транспорт йўлакларини ривожлантириш соҳасидаги лойиҳаларни ўзаро мувофиқлаштиришга келишиб олди.

2023 йилнинг ноябрь ойида Тошкентда Шанхай ҳамкорлик ташкилоти (ШҲТ) давлатларининг биринчи транспорт форуми доирасида Беларусь – Россия – Қозоғистон – Ўзбекистон – Афғонистон – Покистон халқаро транспорт коридорини яратиш ва ривожлантириш бўйича англашув меморандуми имзоланган эди.