ТОШКЕНТ, 16 июль. /“Дунё” АА/. Кипр ва Ўзбекистон бизнес уюшмаси вице-президенти Наталия Кардаш бошчилигида кипрлик тадбиркорлардан иборат делегация Тошкентга ташриф буюрди, деб хабар бермоқда “Дунё” АА мухбири.

Ўзбекистоннинг Рим шаҳридаги дипломатик ваколатхонаси ташаббуси билан ташкил этилган хизмат сафарида Кипрнинг ўндан ортиқ ишбилармон доиралари вакиллари иштирок этди.

Ташриф доирасида “IT Park” ва “Holiday Inn Tashkent City” майдонларида ахборот технологиялари, инвестициялар, банк соҳаси, ҳуқуқ, савдо ва косметика саноати вакиллари иштирокида давра суҳбатлари ҳамда B2B форматида икки томонлама учрашувлар ўтказилди.

Мулоқот давомида делегация таркибидаги компаниялар “IT Park” резидентига айланиш ҳамда Европа инвесторларини стартап лойиҳаларига жалб этиш бўйича ҳамкорлик қилиш ниятини билдирди.

Кипр томони Ўзбекистонда амалга оширилаётган ислоҳотлар хусусий тадбиркорликни ривожлантириш ва хорижий инвестицияларни жалб этиш учун янги имкониятлар яратаётганини таъкидлади.

Шунингдек, “EUROUZ” ва “IT Community of Uzbekistan” бизнес-клублари билан Европа Иттифоқи бозорига чиқиш, ахборот-коммуникация технологиялари соҳасидаги алоқаларни кенгайтириш ҳамда хорижий буюртмачилар билан ишлаш имкониятлари кўриб чиқилди.

Бундан ташқари, Кипр ва Ўзбекистон бизнес уюшмасининг “IT Alliance”, “AmCham”, “Pro Business Club” ҳамда “HR Business Partners Association” билан ҳамкорлик қилиш истиқболлари муҳокама қилинди.

Томонлар Ўзбекистоннинг инвестиция салоҳиятини ихтисослашган нашрлар орқали тарғиб қилиш, мунтазам бизнес-миссияларни ташкил этиш ва соҳага европалик мутахассисларни жалб этишни ҳамкорликнинг устувор йўналишлари эканини қайд этди.

Ташриф якунида ишбилармонлик алоқаларини янада фаоллаштириш ва жорий йил сентябрь ойида Никосия шаҳрида навбатдаги Ўзбекистон–Кипр бизнес-форумини ўтказиш бўйича келишувга эришилди.