ТОКИО, 12 апрель. /“Дунё” АА/. Элчихона кўмагида Тадбиркорлар ва ишбилармонлар ҳаракати – Ўзбекистон Либерал-демократик партияси (OʻzLiDeP) ҳамда Япония Либерал-демократик партияси ўртасида онлайн учрашув ташкил этилди, деб хабар қилмоқда “Дунё” АА мухбири.

Музокараларда ўзбек томонига OʻzLiDeP Сиёсий кенгаши ижроия қўмитаси раиси Актам Хаитов бошчилик қилди. Япон томонидан эса Япония Парламенти Вакиллар палатаси депутати, Либерал-демократик партия Халқаро алоқалар бюроси директори Таро Коно иштирок этди.

Учрашув аввалида Таро Коно мазкур мулоқот Ўзбекистон ва Япония ўртасидаги партиялараро ҳамкорлик тарихида илк бор ташкил этилаётганини таъкидлаб, унинг тарихий аҳамиятга эга эканини қайд этди. Ушбу мулоқотлар 2025 йил декабрь ойида Ўзбекистон Президентининг Японияга амалга оширган ташрифи доирасида эришилган келишувларнинг мантиқий давоми экани эътироф қилинди.

Таро Коно 2019 йилда Ўзбекистон Президентининг Японияга ташрифи чоғида Япония Ҳукумати таркибида фаолият юритганини ҳамда собиқ бош вазир Синдзо Абэ билан биргаликда ушбу ташрифни ташкил этишда иштирок этганини эслади.

Япон томони OʻzLiDeP билан ҳамкорликни йўлга қўйишга тайёр эканини билдириб, айниқса, 2025 йил декабрь ойидаги олий даражадаги ташриф доирасида эришилган келишувларни амалга ошириш, жумладан таълим ва инвестиция соҳаларида амалий ҳамкорликни кенгайтириш муҳимлигини қайд этди.

Ўз навбатида, Актам Хаитов Ўзбекистон Президенти раҳбарлигида сиёсий партиялар фаолиятини такомиллаштириш, уларнинг жамият ҳаётидаги ролини ошириш ва демократик ислоҳотларни чуқурлаштириш бўйича кенг кўламли ишлар амалга оширилаётгани ҳақида маълумот берди. У партиялараро ҳамкорликнинг устувор йўналишларини белгилаб, мулоқотни тизимли равишда йўлга қўйиш учун алоқа канали ташкил этилгани учун миннатдорлик билдирди.

Таро Коно билдирилган таклифларни қўллаб-қувватлаб, уларни амалга оширишга тайёр эканини билдирди. Шунингдек, у шу йил май ойида Ўзбекистонга режалаштирилган ташрифи доирасида мазкур масалаларни батафсил муҳокама қилишни таклиф этди. Ушбу ташриф доирасида партиялар ўртасида ҳамкорлик тўғрисида меморандум имзолаш ташаббуси илгари сурилиб, мазкур ҳужжат келгусидаги ҳамкорлик учун мустаҳкам асос бўлиб хизмат қилиши айтилди.

Шу билан бирга, япон томони OʻzLiDeP делегациясини Японияга ташриф билан келишга таклиф этди ҳамда ўзаро ташрифларни мунтазам йўлга қўйиш муҳимлигини қайд этди.

Учрашув якунида томонлар Ўзбекистон ва Япония ўртасидаги стратегик шериклик муносабатларини янада мустаҳкамлаш, партиялараро ҳамкорликни кенгайтиришдан манфаатдор эканини таъкидлади.