АНҚАРА, 29 сентябрь. /"Дунё" АА/. Ўзбекистон элчихонаси кўмагида Туркия Ташқи иқтисодий алоқалар кенгаши ва Андижон вилояти ҳокимлиги вакиллари иштирокида вебинар ташкил этилди, деб хабар қилмоқда "Дунё" АА мухбири.

Вебинарда икки мамлакат элчилари, Ташқи иқтисодий алоқалар кенгашининг Туркия-Ўзбекистон қўмитаси раиси Ўзғур Онур Ўзгувен, Андижон вилояти ҳокимлиги мутасаддилари ва вилоятида фаолият олиб бораётган турк инвесторлари иштирок этди.

Андижон вилоятининг савдо-иқтисодий, инвестициявий, автомобилсозлик, тўқимачилик, қишлоқ хўжалиги ва озиқ-овқат саноати, уй-жой қурилиши ва қурилиш материаллари соҳаларидаги салоҳияти ҳамда ҳудудда янги ташкил этилган эркин иқтисодий зоналар ҳақида тақдимотлар ўтказилди.

Андижон вилоятида ишлаётган "MASIS TEKS" қўшма корхонаси бош директори Йилмаз Сосял, "OZDEMIR KIMYA" хорижий корхонаси таъсисчиси Зеки Ўздемир ўз фаолиятлари ва тажрибалари билан ўртоқлашди.

Вебинар якунида Туркиялик йирик ишбилармон доира вакилларининг Ўзбекистонга, хусусан, Андижон вилоятига, ўз ўрнида андижонлик тадбиркорларнинг Туркияга бизнес-миссияларини ташкил қилишга келишиб олинди.