ТОШКЕНТ, 25 июнь. /“Дунё” АА/. Пойтахтимизда V Тошкент халқаро инвестиция форуми (ТХИФ) доирасида Ўзбекистон ва Озарбайжон давлат идоралари, иқтисодий зоналари ҳамда ишбилармон доиралари вакиллари иштирокида Ўзбекистон–Озарбайжон бизнес-форуми бўлиб ўтди, деб хабар бермоқда “Дунё” АА мухбири.

Учрашувнинг асосий мавзулари саноат кооперацияси, махсус иқтисодий зоналарни ривожлантириш, Ўзбекистон ва Озарбайжон ўртасидаги транспорт-логистика ва инфратузилмавий ўзаро боғлиқликни мустаҳкамлашдан иборат бўлди.

Муҳокамалар давомида қўшма лойиҳаларни амалга оширишда ўзаро ҳамкорликнинг амалий механизмлари муҳимлиги қайд этилди. Озарбайжон–Ўзбекистон инвестиция компанияси (ОЎИК) бош директори Нозим Ҳожиевнинг таъкидлашича, форум доирасидаги алоҳида Ўзбекистон–Озарбайжон сессияси эркин иқтисодий зоналар, логистика ва саноат кооперациясини қамраб олган икки томонлама кун тартиби кенгайиб бораётганининг муҳим кўрсаткичидир.

Қайд этилишича, 2023 йилда икки мамлакат ҳукуматлари томонидан 500 миллион долларлик устав капитали билан ташкил этилган ОЎИК ишлаб чиқариш, технологиялар ва инфратузилма соҳаларидаги қўшма лойиҳаларни тўғридан-тўғри молиялаштириш воситаси сифатида хизмат қилади.

Форум якунларига кўра, икки мамлакат ўртасидаги кенгайиб бораётган иқтисодий ҳамкорлик доирасида тузилма фаолиятининг асосини ташкил этувчи йўналишларга қизиқиш ортгани таъкидланди.