СИЭТЛ, 27 июль. /“Дунё” АА/. Мамлакатимизнинг Вашингтон штатидаги Бош консулхонаси ташаббуси билан Ўзбекистон ва АҚШнинг шимоли-ғарбий ҳудудлари ўртасидаги ҳамкорликни ривожлантиришга бағишланган давра суҳбати бўлиб ўтди, деб хабар бермоқда “Дунё” АА мухбири.

Тадбирда “Boeing China”нинг собиқ президенти Жон Брунс, АҚШнинг Вьетнамдаги собиқ элчиси Майкл Микалак, “World Affairs Council Seattle” президенти Жаклин Миллер, “Dorsey & Whitney” ва “K&L Gates” юридик фирмалари раҳбарлари, “Amazon”, “Google”, “Microsoft” ҳамда маҳаллий ишбилармон ва академик доиралар вакиллари иштирок этди.

Учрашувда Ўзбекистонда амалга оширилаётган кенг кўламли сиёсий, иқтисодий ва институционал ислоҳотлар, инвестиция муҳитини такомиллаштириш бўйича кўрилаётган чоралар, хорижий сармоядорлар учун яратилган имкониятлар ҳамда саноат, энергетика, рақамли иқтисодиёт, логистика, туризм ва юқори технологиялар соҳаларидаги истиқболли лойиҳалар тақдим этилди.

Музокаралар чоғида инвесторлар ҳуқуқларини ҳимоя қилиш кафолатлари, давлат-хусусий шериклик механизмлари, транспорт-логистика инфратузилмасини ривожлантириш ва инновациялар соҳасидаги ҳамкорлик имкониятлари муҳокама қилинди. Иштирокчилар сўнгги йилларда Ўзбекистонда амалга оширилган ислоҳотларни юксак баҳолаб, мамлакатнинг Марказий Осиёдаги ишончли иқтисодий ҳамкор сифатидаги ўрни мустаҳкамланаётганини таъкидлади.

Тадбир якунлари бўйича қатор истиқболли йўналишларда амалий ҳамкорликни йўлга қўйиш, инвестиция лойиҳаларини биргаликда ишлаб чиқиш ҳамда Ўзбекистоннинг тегишли давлат идоралари билан тўғридан-тўғри мулоқотни ташкил этиш юзасидан келишувларга эришилди.