ТОШКЕНТ, 14 май. /"Дунё" АА/. Осиё Олимпия кенгашининг (ООК) 46-Бош Ассамблеяси 2026 йилда Тошкент шаҳрида ўтказилади, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, бу ҳақида Осиё Олимпия кенгашининг 45-Бош ассамблеясида маълум қилинди.

ООК бош директори Ҳусайн Ал Мусалламнинг Бош ассамблеяни 2026 йил Тошкент шаҳрида ўтказиш бўйича таклифи йиғилиш иштирокчилари томонидан бир овоздан қўллаб-қувватланди. Бу юртимизда спорт ва Олимпия ҳаракатига бўлган юқори эътибор ва халқаро майдондаги нуфузини яна бир бор тасдиқлайди.

Маълумки, Бош ассамблея – Осиё Олимпия кенгашининг энг юқори бошқарув органи бўлиб, унда қитъамизнинг 45 мамлакат Миллий Олимпия қўмиталари вакиллари қатнашади. Бош ассамблеяда Осиё спортига оид муҳим қарорлар, қитъадаги спорт сиёсати ва истиқболли йўналишлар муҳокама қилинади.

Эслатиб ўтамиз, 2022 йилда Тошкент ООКнинг Ижроия қўмитаси йиғилишига муваффақиятли мезбонлик қилган эди.