СЕРЕМБАН, 14 сентябрь. /"Дунё" АА/. 13 сентябрь куни Малайзиянинг Негери-Сембилан штатида баскетбол бўйича аёллар ўртасида U-16 Осиё кубоги бошланди, деб хабар қилмоқда "Дунё" АА мухбири.

Мазкур мусобақада Ўзбекистон терма жамоаси ҳам иштирок этмоқда. Рустамхон Дадахонов бошчилигидаги Ўзбекистон U-16 аёллар терма жамоаси Осиё кубогининг дастлабки ўйинида Самоа жамоаси устидан ғалабага қозонди. Ушбу учрашув 65:62 ҳисобида баскетболчи қизларимизнинг устунлиги билан якунланди.

Ўзбекистон жой олган "А" гуруҳининг бошқа иштирокчилари – Ҳиндистон ва Эрон терма жамоалари ўртасидаги ўйинда ҳиндистонликларнинг қўли баланд келди.

Ўзбекистон U-16 аёллар терма жамоаси ўзининг иккинчи учрашувини бугун Ҳиндистонга қарши ўтказади.