ТОШКЕНТ, 17 июнь. /"Дунё" АА/. Бугун Венгрия пойтахти Будапешт шаҳрида ўтаётган дзюдо бўйича Жаҳон чемпионатининг бешинчи кун беллашувлари бўлиб ўтади, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, унда эркаклар -90 кг, аёллар -70 кг вазн тоифаларида медальлар учун кураш олиб боради.      Кун давомида Ўзбекистон терма жамоасининг 3 нафар аъзоси иштирок этади.

Жумладан,  -90 кг вазнда Шаҳзодхўжа Шарипов Норвегия вакили Корнелиус Эйлертсенга, -90 кг вазнда Нурбек Муртазоев маврикийлик спортчи Реми Феуллега, -70 кг вазнда Хуршида Раззоқбердиева Хитой Тайпейи вакиласи Ю-Жинг Лиаога қарши баҳс олиб боради.

Шу кунгача ўтган беллашувларда ҳамюртларимиздан Шукуржон Аминова (-57 кг) ҳамда Арслонбек Тожиев (-81 кг) бронза медали учун курашиш босқичигача етиб келишган. Аммо ушбу баҳсларда рақиблар устунлик қилиб, ҳар икки дзюдочимиз бешинчи натижа билан мусобақани якунлади.