ДEҲЛИ, 29 сентябрь. /"Дунё" АА/. Ўзбекистон миллий терма жамоаси Деҳли шаҳрида бўлиб ўтаётган пара енгил атлетика бўйича жаҳон чемпионатидаги муваффақиятли иштирокини давом эттирмоқда, деб хабар бермоқда "Дунё" АА мухбири.

27 сентябрь – 7 октябрь кунлари бўлиб ўтаётган чемпионатга 100 дан ортиқ давлатдан рекорд даражадаги спортчилар ташриф буюрган.

Ўзбекистонлик спортчиларнинг чиқишлари биринчи кунданоқ ёрқин ва самарали бўлди.

Бугун куннинг биринчи ярмида Ёқутхон Холбекова узунликка сакраш (5,54 м, Т12 тоифаси) бўйича мусобақаларда энг юқори натижани кўрсатиб, олтин медаль соҳибасига айланди.

Чемпионатнинг биринчи кунида Кубаро Ҳакимова аёллар ўртасида ядро улоқтириш бўйича мусобақаларда (F41 тоифаси) кумуш (10,17 м) медални қўлга киритди. Мамлакатимизнинг яна бир вакили Наврўза Аҳматова 9,49 м натижа билан тўртинчи ўринни эгаллади.

Найза улоқтириш бўйича беллашувда (F46 тоифаси) 41,97 м натижа қайд этган Шаҳина Йигиталиева Ўзбекистон терма жамоаси ҳисобига яна битта кумуш медални келтирди.

Ядро улоқтириш баҳсларида (F37 тоифа) Толиббой Йўлдошев бронза медали соҳиби бўлди (15,86 м).

Чемпионатнинг иккинчи куни Ёрқинбек Одилов енгил атлетика мухлисларини мамнун этди.

Ўзбекистон терма жамоаси аъзоси найза улоқтириш бўйича (F57 тоифа) 52,06 м натижа билан шоҳсупанинг иккинчи поғонасига кўтарилди.

Шу тариқа, мамлакатимиз вакиллари чемпионатнинг ҳозирча битта олтин, учта кумуш ва битта бронза медалини жамлади.

Ҳиндистондаги жаҳон чемпионати 2028 йилги ёзги Паралимпия ўйинлари учун муҳим саралаш босқичи ҳисобланади.