ТОШКЕНТ, 10 июль. /"Дунё" АА/. ФИФА бугун ўзининг миллий терма жамоалар бўйича янгиланган рейтингини эълон қилди, деб хабар қилмоқда "Дунё" АА мухбири.

Эътиборлиси, мазкур рейтингда Ўзбекистон миллий терма жамоаси 2 поғонага юқорига кўрилиб, 1449,12 очко билан 55-ўринда қайд этилди.

Миллий терма жамоамиз Осиёда Япония, Эрон, Жанубий Корея, Австралия ва Қатардан кейин 6-ўринда бормоқда. Ўзбекистондан кейинги ўринларни Ироқ ва Саудия Арабистони терма жамоалари ўрин эгаллаган.

Ўзбекистон миллий терма жамоаси июнь ойида икки муҳим баҳсни ўтказди. Дастлаб, 5 июнь куни бош жамоамиз 2026 йилда  Мексика, АҚШ ва Канада яшил майдонларига бўлиб ўтадиган Жаҳон чемпионати саралашининг 3-босқичи доирасида меҳмонда БААга қарши ўйнади. Мазкур баҳсда қайд этилган 0:0 ҳисоби Ўзбекистон миллий терма жамоасига тарихда илк маротаба Жаҳон чемпионати йўлланмасини тақдим этди. 10 июнь куни пойтахтимиздаги "Бунёдкор" стадионида бўлиб ўтган  мазкур саралаш босқичининг сўнгги туридан ўрин олган Қатарга қарши баҳс эса 3:0 ҳисобида Ўзбекистон терма жамоаси фойдасига ҳал бўлди. 

Ушбу икки ўйинда қўлга киритилган ижобий натижалар Ўзбекистон терма жамоасининг ФИФА рейтингидаги ўрнини мустаҳкамлашига  хизмат қилди.

ФИФА рейтингини Аргентина терма жамоаси бошқариб бормоқда. Испания иккинчи Франция эса учинчи ўринда жойлашган.