ТОШКЕНТ, 26 май. /"Дунё" АА/. Қатарда бўлиб ўтадиган 17 ёшгача бўлган футболчилар ўртасидаги Жаҳон чемпионатига қуръа ташланди, деб хабар қилмоқда "Дунё" АА мухбири.

Ўзбекистон футбол ассоциацияси маълумотига кўра, мундиалга қуръа ташлаш маросими Доҳа шаҳрида бўлиб ўтди.

Қуръа натижасига кўра, Ўзбекистон U-17 терма жамоаси Жаҳон чемпионатининг "J" гуруҳидан ўрин олди. Ушбу гуруҳдан, шунингдек, Парагвай, Панама ва Ирландия терма жамоалари жой олган. Ўзбекистон U-17 терма жамоаси мундиалдаги дастлабги учрашувни 5 ноябрь куни Парагвайга қарши ўтказади. 8 ноябрда Ирландия билан ўйин бор. Гуруҳдаги сўнгги учинчи ўйин 11 ноябрь куни Панама термасига қарши кечади.

Шу йилнинг 3-27 ноябрь кунлари Қатарда ўтадиган мундиалда 48 та терма жамоа 4 тадан 12 гуруҳга бўлинди. Дастлабки икки ўринни эгаллаган 24 жамоа ва энг яхши 8 та 3-ўрин эгалари 1/16 финал босқичига йўлланма олади.