ТОШКЕНТ, 26 июнь. /"Дунё" АА/. Бугун Малайзиянинг Куала-Лумпур шаҳрида футзал бўйича "Осиё кубоги-2026" саралаш босқичига қуръа ташланди, деб хабар қилмоқда "Дунё" АА мухбири.

Ўзбекистон футзал федерациясидан олинган маълумотга кўра, Ўзбекистон терма жамоаси "F" гуруҳидан ўрин эгаллади. Мазкур босқичда терма жамоамиз Қирғизистон, Шарқий Тимор ва Фаластин терма жамоалари билан куч синашади.

Қуръа доирасида 31 та жамоа 8 та гуруҳга тақсимланди. Унга кўра, 7 та гуруҳда 4 тадан, 1 та гуруҳда эса 3 та жамоа ўрин олди.

Саралаш ўйинларида гуруҳларда биринчи ўринни эгаллаган жамоалар ҳамда иккинчи ўринни банд этган жамоаларнинг энг яхши кўрсаткичга эга бўлган 7 таси финал босқичига йўлланма олади.

Шундай қилиб, қитъа чемпионати финал раундида мезбонлардан ташқари саралаш баҳсларидан муваффақиятли ўтган 15 та жамоа иштирок этади.

Эслатиб ўтамиз, футзал бўйича "Осиё кубоги-2026" Индонезияда бўлиб ўтади.