ТОШКЕНТ, 22 июнь. /"Дунё" АА/. Вьетнамнинг Вунгтау шаҳрида спорт курашлари бўйича 23 ёшгача бўлган спортчилар ўртасида Осиё чемпионати якунланди, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, мусобақанинг сўнгги кунида курашчиларимиз иккита кумуш ва битта бронза медалини қўлга киритишди.

Жумладан, бугунги беллашувларда -65 кг вазн тоифасида Умиджон Жалолов кумуш медалга сазовор бўлди. -74 кг вазн тоифасида Зафарбек Отахонов ҳам ишончли кураш олиб бориб, кумуш медални қўлга киритди. -92 кг вазн тоифасида Садриддин Даминжонов учинчи ўринни эгаллади.

Шу тариқа ушбу ёш тоифасидаги спортчиларимиз қитъа биринчилигини 2 та олтин, 5 та кумуш ва 9 та бронза, жами 16 та медаль билан якунлашди.

Эртадан U-17 ёш тоифасидаги полвонларимиз баҳсларга киришишади.