ГУАНЧЖОУ, 15 май. /"Дунё" АА/. Хитойнинг Гуандун провинциясининг Гуанчжоу шаҳрида бадиий гимнастика бўйича "East cup & Olympic stars" халқаро турнири ўтказилди, деб хабар қилмоқда "Дунё" АА мухбири.

Ушбу мусобақада Ўзбекистоннинг 11 нафар ёш иқтидорли спортчилари ва Хитой, Вьетнам, Австралия, Арманистон, Россия, Туркманистон, Қозоғистон атлетлари ғолиблик учун кураш олиб борди. Қизғин ва муросасиз кечган мусобақаларда спортчи қизларимиз юртимиз шарафини муносиб ҳимоя қилиб, қатор совринли ўринларни эгаллашди.

Жумладан, якка чиқишлар дастурида ватандошларимиз Даника Мун ва Сафина Яндашева жамоавий баҳсларда эса 2015-2016 йилларда таваллуд топган спортчилардан ташкил топган Ўзбекистон терма жамоаси биринчи ўринни эгаллади.

Ғолиб ва совриндорлар ташкилотчилар ва тадбир ҳомийлари томонидан медаль ва эсдалик совғалари билан тақдирландилар.

Турнир доирасида бўлиб ўтган Халқаро спорт клублари ассоциациясининг 3-конгресс йиғилишида Вьетнам, Австралия, БАА давлатларидаги спорт клубларини аъзоликка қабул қилиш масалалари кўриб чиқилди. Шунингдек, халқаро ҳамкорликни ривожлантириш истиқболлари ва жорий йилда ўтказилиши режалаштирилган мусобақаларининг ташкилий жиҳатлари муҳокама қилинди.