СИЭТЛ, 5 сентябрь. /“Дунё” АА/. Вашингтон штати губернатори Боб Фергюсон мамлакат мустақиллигининг 32 йиллиги шарафига 1 сентябрни штат миқёсида расман “Ўзбекистон Мустақиллиги куни” деб эълон қилди, деб хабар беради “Дунё” АА мухбири.

Расмий баёнотда Ўзбекистон мустақиллигининг тарихий аҳамияти, унинг маданий мероси ҳамда тинчлик, фаровонлик ва миллий тараққиётга интилиши қайд этилган.

Шунингдек, ҳужжатда Ўзбекистон ва АҚШ ўртасида савдо, сармоя, технология, таълим, тоза энергетика, туризм ва гуманитар алмашинувлар соҳаларидаги ҳамкорлик кенгайиб бораётгани таъкидланган.

Сиэтл шаҳрида Ўзбекистоннинг АҚШдаги биринчи Бош консулхонаси очилгани алоҳида қайд этилиб, у Ўзбекистон ва Вашингтон штати ўртасидаги янги боғловчи бўғин сифатида эътироф этилган. Прокламацияда штатдаги ўзбек-америка ҳамжамиятининг маданий ва ишбилармонлик алоқаларини ривожлантиришга қўшган ҳиссаси ҳам юқори баҳоланган.

Аввалроқ Орегон штати, Сиэтл, СиТак ва Вашингтон шаҳарлари 1 сентябрни Ўзбекистон Мустақиллиги куни деб эълон қилган эди. Губернаторнинг ушбу қарори Ўзбекистон ва АҚШ ўртасидаги алоқалар мустаҳкамланиб бораётганининг яна бир далили бўлди.