ЕКАТЕРИНБУРГ, 7 октябрь. /"Дунё" АА/. Россиянинг Екатеринбург шаҳрида бўлиб ўтган "Expotravel-2025" халқаро сайёҳлик кўргазмасида Ўзбекистон ҳудудларининг туризм салоҳияти намойиш этилди, деб хабар қилмоқда "Дунё" АА мухбири.

Кўргазмада давомида Ўзбекистонда хорижлик сайёҳлар учун яратилган шарт-шароитлар ва хавфсизлик чоралари ҳақида маълумот берилди. Шунингдек, тадбир иштирокчиларига Ўзбекистон туризм салоҳиятига оид буклетлар ва журналлар тарқатилди.

Ўзбекистон Туризм қўмитаси делегацияси вакиллари Россия, Венгрия, Словакия, Шри-Ланка каби бир қатор давлатлар турфирмалари вакиллари билан музокаралар ўтказди. Уларда икки томонлама сайёҳлар алмашинувини йўлга қўйиш, туризм соҳаси вакиллари иштирокида инфо-турлар ташкил қилиш ва Ўзбекистоннинг бой маданияти ва туризм имкониятларига бағишланган материалларни нуфузли оммавий ахборот воситаларида доимий равишда эълон қилиш юзасидан келишиб олинди.

Кўргазма саҳнасида Мукаррама Турғунбоева номидаги "Баҳор" давлат рақс ансамбли жамоаси томонидан тақдим этилган концерт дастури барчага бирдек манзур бўлди.