Қозоғистонда бўронда қолиб кетган ўзбекистонликлар қутқарилди

Қозоғистонда Фавқулодда вазиятлар вазирлиги ходимлари қор бўронида қолиб кетган уч нафар ўзбекистонликни қутқарди. Аниқланишича, қутқарувчилар 24 соат ичида 87 нафар фуқаро, жумладан 6 нафар болани қутқариб, эвакуация қилган. Шунингдек, 10 та автомашина қор уюмларидан чиқариб олинган.

Манба: gov.kz

***

Россия Кубага парвозларни вақтинча тўхтатди

“Россия” авиакомпанияси ва Nordwind Кубага парвозларни ёнилғи қуйдириш билан боғлиқ муаммолар туфайли вақтинча тўхтатишини маълум қилди. Маълумотга кўра, “Россия” яқин бир неча кун ичида Куба аэропортларидан россиялик сайёҳларни олиб чиқиш учун бир нечта махсус рейсларни амалга оширади. Туроператорлар баҳолашича, ҳозир Кубада тахминан 4000 нафар россиялик бор.

Манба: Deutsche Welle

***

Туркия парламентида депутатлар муштлашди

Туркия парламентида депутатлар Адлия вазирлигига баҳсли тайинлов туфайли муштлашди. Можаро мухолифатдаги Республика халқ партияси ҳамда ҳукмрон Адолат ва тараққиёт партияси ўртасида юз берди. Ҳодиса янги адлия вазири Акин Гурлек қасамёд қилаётган пайтда содир бўлган.

Манба: Euronews

***

Европарламент Украина учун 90 млрд евро кредитни маъқуллади

Евродепутатлар Украинага молиявий ёрдам пакети учун овоз берди. У пакетга 2026–2027 йилларда мамлакатнинг молиявий эҳтиёжларини қоплаш учун 90 млрд евро миқдоридаги қўллаб-қувватлаш кредити (Ukraine Support Loan), Украинани қўллаб-қувватлаш механизми (Ukraine Facility)га ўзгартиришлар ва ЕИнинг 2021–2027 йилларга мўлжалланган кўп йиллик молиявий доирасига тузатишлар киради.

Манба: Deutsche Welle

***

Лукашенко Тинчлик кенгаши йиғилишида иштирок этишдан бош тортди

Беларусь етакчиси Александр Лукашенко Ғазо сектори бўйича Тинчлик кенгашининг биринчи йиғилишида иштирок этиш таклифини рад этди. Матбуот котиби Наталя Эйсмонтнинг маълум қилинишича, Александр Лукашенкога етакчиларнинг Тинчлик кенгаши доирасидаги биринчи учрашувига таклифнома анча кеч келган.

Манба: БелТА

***

Сингапур қишки Олимпиадада ягона вакилига олтин медални қўлга киритса 788 минг доллар тўлайди

Сингапур Италиянинг Милан ва Кортина д'Ампеццо шаҳарларида ўтказилаётган 2026 йилги қишки Олимпия ўйинларида ғалаба қозонгани учун энг катта мукофот тўлайдиган давлатлар рўйхатида биринчи ўринни эгаллади. Ўйинларда Сингапурдан ягона вакил - 23 ёшли тоғ чанғичиси Файз Баша иштирок этмоқда. Олтин медаль учун у 788 минг доллар, кумуш учун 394 минг доллар, бронза учун 197 минг доллар олиши мумкин.

Манба: USA Today

***

Зеленский сайловлар ҳақидаги хабарларни инкор қилди

Украина президенти Володимир Зеленский “Financial Times” нашри тарқатган — гўё у 24 февраль куни, Россиянинг Украинага қарши тўлиқ кўламли уруши бошланганига тўрт йил тўлган санада, президент сайловлари санаси ҳамда тинчлик таклифлари бўйича референдум ҳақида эълон қилишни режалаштираётгани ҳақидаги маълумотни рад этди.

Манба: Deutsche Welle

***

Қозоғистонда боланинг ичагидан 31 та магнит чиқариб олинди

Қозоғистонда 31 та магнитни ютиб юборган 1 ёш 9 ойлик боланинг ҳаёти сақлаб қолинди. Маълум бўлишича, бола Олмаота шаҳридаги шифохонага жуда оғир аҳволда олиб келинган. Текширувлар давомида унинг ичагида кўплаб магнитлар борлиги аниқланган. Шифокорлар ингичка ичакнинг бир нечта жойи тешилганини ҳамда қорин бўшлиғида яллиғланиш ривожланганини таъкидлаган.

Манба: Казинформ