НОВОСИБИРСК, 3 апрель. /“Дунё” АА/. Ўзбекистон Бош консулхонаси томонидан Россиянинг Новосибирск вилояти муфтийси Абдулҳамид Шокиржоновнинг Ўзбекистонга илк ташрифи ташкил этилди, деб хабар бермоқда “Дунё” АА мухбири.

Делегация 2026 йил 1–5 апрель кунлари мамлакатимизда турли тадбирларда иштирок этиши режалаштирилган. Меҳмонлар дастлаб Ўзбекистон мусулмонлари идораси вакиллари билан учрашувлар ўтказади. Юртимизнинг етакчи уламолари билан фикр алмашиб, маънавий-маърифий соҳада тажриба алмашади.

Учрашувлар давомида диний таълим, жамоатчилик ва ёшлар билан ишлаш, шунингдек, диний меросни сақлаш ва ривожлантириш масалалари муҳокама қилиниши кутилмоқда. Бу жараён икки томон учун ҳам ҳамкорлик имкониятларини кенгайтириш ва янги лойиҳаларни амалга ошириш учун муҳим аҳамиятга эга.

Делегация Жума намозини янги очилган Имом Бухорий ёдгорлик мажмуасида адо этиши режалаштирилган. Бу тадбир нафақат диний маросим сифатида, балки тарих ва маданий меросни ўрганиш учун ҳам муҳим аҳамият касб этади.

Шунингдек, делегация Тошкент, Самарқанд ва Бухоронинг тарихий қадамжоларини зиёрат қилиб, юртимиз маданий ва маънавий бойлигини яқиндан кўриш имконига эга бўлади.

Ташриф доирасида янги ҳамкорлик лойиҳаларини муҳокама қилиш, тажриба алмашиш ва икки томонлама алоқаларни янада мустаҳкамлаш мақсадида қатор тадбир ва учрашувлар ҳам режалаштирилган. Бу ташриф, Ўзбекистон ва Россия, жумладан, Новосибирск вилояти ўртасидаги маданий-маънавий алоқаларни янада ривожлантиришга замин яратади.