ВАРШАВА, 10 апрель. /“Дунё” АА/. Ўзбекистон дипломатлари Польшанинг Лодзь махсус иқтисодий ҳудуди раҳбари Томаш Сажиньски билан учрашди, деб хабар қилмоқда “Дунё” АА мухбири.

Мулоқот чоғида томонлар икки давлат ўртасида савдо-иқтисодий ҳамкорликни кенгайтириш, экспорт салоҳиятини ошириш ҳамда инвестицияларни жалб этишга қаратилган иқтисодий дипломатия ҳақида фикр алмашди.

Польша томони Ўзбекистондаги эркин иқтисодий зоналар, хусусан “Қўқон” эркин иқтисодий ҳудуди билан тўғридан-тўғри ҳамкорлик ўрнатишдан манфаатдор эканини билдирди.

Томаш Сажиньски шу йилнинг май ойида “Қўқон” эркин иқтисодий ҳудуди ва унда фаолият юритаётган корхоналар вакилларидан иборат делегацияни Польшага таклиф этди.

Ушбу ташриф доирасида Лодзь шаҳрида бизнес-учрашувлар ўтказиш, инвестициявий имкониятларни тақдим этиш ҳамда икки томонлама алоқаларни кенгайтиришга қаратилган музокараларни ташкил этиш режалаштирилмоқда.