АНҚАРА, 18 январь. /“Дунё” АА/. Туркиянинг йирик “Анадолу” ахборот агентлиги футбол бўйича миллий терма жамоамиз сардори Элдор Шомуродовдан олган интервьюсини эълон қилди, деб хабар бермоқда “Дунё” АА мухбири.

Интервьюда ёзилишича, сўнгги йилларда Ўзбекистонда спорт, хусусан, футболда катта натижаларга эришилган. Ўзбек футболчилари нафақат мамлакатда, балки хориж мухлислари орасида ҳам меҳр қозониб, юрт довруғини жаҳонга ёймоқда. Истанбулнинг “Башакшеҳир” футбол жамоаси таркибида тўп сураётган Элдор Шомуродов ҳам Ўзбекистондаги энг таниқли футболчилардан бири ҳисобланади.

Ўзбекистонлик ушбу футболчи Туркия Суперлигасининг биринчи мавсумида маҳоратини кўрсатиб, 17 та ўйинда 12 та гол уриб, энг яхши тўпурар номига сазовор бўлди.

Элдор ўзбек футболи сўнгги йилларда катта ютуқларга эришганини таъкидлар экан, бундай натижаларда, аввало, давлат раҳбарининг футболга кўрсатаётган катта эътиборини алоҳида эътироф этган.

“Ёшларга ҳар бир соҳада кенг имконият тақдим этилмоқда. Бунинг натижасида, ёшлар ўз салоҳиятини намойиш этиб, юксак натижаларга эришмоқда. Ўйлайманки, сўнгги 10-15 йил ичида биз катта юксалишни бошдан кечирдик”, деб таъкидлаган Элдор Шомуродов.

Интервьюда Ўзбекистон терма жамоаси сардори 2026 йил АҚШ, Канада ва Мексикада ўтказиладиган Жаҳон чемпионати ҳақида ҳам алоҳида фикр юритган:

“Биз тарихда илк бор 2026 йилги Жаҳон чемпионатига чиқди. Бу, албатта, ажойиб! Мундиалга чиқишни неча йиллардан буён кутиб юрган халқимиз бундан жуда хурсанд бўлди. Ҳозирда жаҳон чемпионатига астойдил тайёргарлик кўрмоқдамиз. Мақсадимиз – муносиб иштирок этиш, Ўзбекистоннинг футбол бўйича ҳам дунёга ўзини кўрсатиш.  

Гуруҳдан чиқиш учун доим имконият бўлган. Албатта, биз фақат иштирок билан чекланмай, яхши натижага эришишга ҳаракат қиламиз. Энг муҳими, нуфузли чемпионатда кучли терма жамоалар билан муносиб тарзда рақобатлашамиз”, дея сўз юритган футболчи.

Элдор Шомуродов суҳбат давомида 2026 йилги Жаҳон чемпионатига йўл олишга имкон берган Бирлашган Араб Амирликлари билан ўйинни унута олмаслигини таъкидлаган:

“Бу энг унутилмас ўйин эди. Айнан шу ўйин бизга мундиалда қатнашиш имконини берди. Ўша ўйинни ҳеч қачон эсимдан чиқармайман, чунки ўша куни бутун футбол фаолиятим кўз ўнгимда ўтган”, деган у.

Интервью давомида Элдор ўзбек миллий таомлари, қадрият ва анъаналари ҳақида ҳам тўхталиб ўтган:

“Ўзбек ошхонаси турк ошхонасидан қолишмайди. Бизнинг турфа миллий таомларимиз баробарида, Самарқанд, Хива ва Бухоро каби тарихий шаҳарларимиз ҳам бор. Тошкентда ҳам кўплаб ўзгаришлар бўлди. Кўплаб гўзал манзиллар бор. Қисқаси, Ўзбекистонга ташриф буюрган киши ҳеч ҳам афсусланмайди”, деб гапирган ўзбекистонлик футболчи.