АММОН, 28 январь. / “Дунё” АА/. Иорданиянинг нуфузли “Аmmon News” нашрида Ўзбекистон Президенти Шавкат Мирзиёевнинг Давосдаги Жаҳон иқтисодий форуми тадбирларидаги иштирокига бағишланган мақола эълон қилинди, деб хабар бермоқда “Дунё” АА мухбири.

Нашрнинг ёзишича, давлатимиз раҳбари форум доирасида “Тинчлик кенгаши” низомини имзолаш маросимида иштирок этиши мамлакат ташқи сиёсати ва иқтисодий кун тартибининг глобал миқёсда кенгайиб бораётганини намойиш этди.

“Бўлиб ўтган музокараларда минтақавий хавфсизлик, кўп томонлама ҳамкорлик, инвестициялар ва барқарор ривожланиш масалалари муҳокама марказида бўлди. Иқтисодий шерикликни кенгайтириш, халқаро сармояларни жалб қилиш, “яшил” энергетика, инфратузилма ва молиявий механизмларни ривожлантиришга алоҳида эътибор қаратилди. Ўтказилган алоҳида учрашувлар дунёнинг етакчи компаниялари ва институтлари Ўзбекистон билан ҳамкорликни чуқурлаштиришга катта қизиқиш билдираётганини яна бир бор тасдиқлади”, дея ёзилган мақолада.

Экспертларнинг фикрича, Ўзбекистоннинг халқаро ташаббуслар ва мулоқотлардаги фаол иштироки мамлакат ташқи сиёсатининг эволюциясини акс эттиради.

Бу жараён илгари асосан минтақавий даражада бўлган бўлса, эндиликда глобал жараёнлар — хавфсизлик, барқарор ривожланиш ва халқаро иқтисодий алоқалардаги сезиларли иштирокка ўтаётганидан далолат беради. Шу тариқа, Ўзбекистон дунё миқёсидаги стратегик масалаларни ҳал этишда фаол ва муҳим иштирокчи сифатида ўз позициясини мустаҳкамлаб бормоқда.