ЛОНДОН, 4 апрель. /“Дунё” АА/. Британиянинг оммабоп “London Post” порталида Ўзбекистон қишлоқ хўжалиги соҳасини ривожлантириш ва инвестициялар учун яратилган имкониятларга бағишланган таҳлилий мақола эълон қилинди, деб хабар бермоқда “Дунё” АА мухбири.

Мақолада ёзилишича, Ўзбекистон иқтисодиётида аграр сектор стратегик аҳамиятга эга ва мамлакат ЯИМнинг қарийб 18–19 фоизини ташкил этади. Бу кўрсаткич дунёдаги ўртача даражадан юқори бўлиб, соҳада меҳнатга лаёқатли аҳолининг тўртдан бири банд эканини кўрсатади.

Британиялик ўқувчилар учун мақолада Ўзбекистон қишлоқ хўжалигини ривожлантиришнинг 2020–2030 йилларга мўлжалланган стратегияси доирасидаги тўққизта устувор йўналиш ҳақида маълумот берилган. Давлат квоталарининг бекор қилиниши ва нархларни либераллаштириш боғдорчилик ва сабзавотчилик каби сердаромад тармоқларни ривожлантиришга туртки бўлгани қайд этилган.

Материалда шунингдек, Ўзбекистон анъанавий пахта ва ғалла етиштиришдан диверсификациялашган моделга ўтгани таъкидланган. Ҳозирда мамлакатда миллионлаб тонна мева-сабзавот ва чорвачилик маҳсулотлари етиштирилмоқда, бу эса экспорт салоҳиятини ошириш ва янги халқаро бозорларга чиқиш учун қулай имконият яратади.

Алоҳида эътибор рақамлаштириш ва сув тежовчи технологияларни жорий этишга қаратилган. Субсидияларни тақсимлашнинг электрон тизимлари ва фермерлар учун рақамли платформалар фермерлар учун маъмурий тўсиқларни камайтириб, бошқарув самарадорлигини оширди.

“London Post” хулосасига кўра, қулай иқлим шароити, давлат қўллаб-қувватлаши ва инновацион ечимларнинг уйғунлиги Ўзбекистонни минтақавий ва халқаро аграр бозорда фаол иштирокчига айлантирмоқда. Бу хорижий инвесторлар учун қишлоқ хўжалиги соҳасида янги имкониятлар эшигини очади.