БЕРЛИН, 3 февраль. /“Дунё” АА/. Ўзбекистон элчиси Дилшод Ахатов Германиянинг Мекленбург–Олд Померания федерал ўлкаси Иқтисодиёт, инфратузилма, туризм ва меҳнат вазирлиги давлат котиби Йохен Шульте билан учрашди, деб хабар бермоқда “Дунё” АА мухбири.

Мулоқот чоғида Ўзбекистон ҳудудлари ва Мекленбург–Олд Померания ўртасидаги савдо-иқтисодий, инвестициявий, маданий-гуманитар ҳамда туризм йўналишидаги алоқаларни янги босқичга кўтариш масалалари муҳокама қилинди.

Учрашув давомида томонлар 2026 йилда Йохен Шульте бошчилигидаги расмий ва ишбилармон доиралар вакилларидан иборат делегациянинг Ўзбекистонга ташрифи бўйича фикр-мулоҳаза алмашди.

Ушбу немис делегациясининг ташрифи доирасида Тошкент шаҳри ва вилоятларда G2B ва B2B шаклидаги музокаралар ўтказилиши режалаштирилган. Шунингдек, Ўзбекистонлик ёшларни Германияда касбий таълимга ва немис тилига ўқитиш, уларни ўлканинг туризм ва гастрономия соҳаларидаги етакчи компанияларига ишга жалб қилиш бўйича қўшма лойиҳалар амалга оширилади.

Тадбирда Мекленбург Олд Помераниянинг йирик шаҳарларида Ўзбекистоннинг иқтисодий ва туристик салоҳиятига бағишланган тақдимотлар ҳам ташкил этилди.

Музокаралар якунида икки томонлама муносабатларни янада бойитиш ва келишилган тадбирларни юқори савияда ўтказиш бўйича ҳамкорликни давом эттиришга келишиб олинди.