МАДРИД, 7 апрель. /“Дунё” АА/. Ўзбекистон ташқи ишлар вазири Бахтиёр Саидов Испанияга ташрифи доирасида бугун қироллик Сенати раисининг биринчи ўринбосари Хавьер Игнасио Марото билан учрашди, деб хабар бермоқда “Дунё” АА мухбири.

“Мадрид шаҳрида Испания Сенати раисининг биринчи ўринбосари Хавьер Игнасио Марото жаноблари билан самарали учрашув ўтказдик, – деб ёзди Ўзбекистон ТИВ раҳбари ўзининг telegram-каналида. – Парламентлараро мулоқотни мустаҳкамлаш, қонун чиқарувчи идоралар ўртасида мунтазам алмашинувларни ривожлантириш масалаларини муҳокама қилдик.

Шу ўринда алоқаларимизда, айниқса иқтисодий дипломатия йўналишида рўёбга чиқарилиши зарур бўлган улкан салоҳият мавжудлигини таъкидладик.

Мамлакатларимиз ўртасидаги узоқ ўтмишга бориб тақаладиган шериклик ўзаро ҳурмат, ишонч ва умумий қадриятлар руҳида мустаҳкамланиб бораверади”.

“Дунё” АА олган сурат