НАМАНГАН, 24 апрель. /“Дунё” АА/. Наманган вилоятида анъанавий Халқаро гуллар фестивали доирасида улкан ва тарихий ташаббусга старт берилди, деб хабар қилмоқда “Дунё” АА мухбири.

Вилоят марказида ўтказилган тантанали маросимда жамоа бўлиб бир ой давомида энг кўп гул экиш орқали Гиннеснинг рекордлар китоби (Guinness World Records) рекордини ўрнатиш жараёни расман бошланди.

Тадбирда вилоят раҳбарияти, нуронийлар, ёшлар, кенг жамоатчилик ва халқаро ташкилотлар вакиллари иштирок этди.

Наманган вилояти ҳокими ўринбосари Ботир Нуритдинов ушбу ташаббус нафақат гул экиш, балки ҳудуднинг экологик барқарорлигини таъминлаш, шаҳар кўриниши ва туризм салоҳиятини оширишга хизмат қилишини таъкидлади.

Тадбирга халқаро даражада ҳам катта эътибор қаратилди. Жараёнларнинг шаффоф ва адолатли ўтишини таъминлаш мақсадида “Guinness World Records”нинг Дубайдаги ваколатхонаси вакили Канзи Дефрави онлайн тарзда иштирок этди. У Наманганда олиб борилаётган ишлар халқаро талаблар асосида кузатиб борилаётганини қайд этди.

Учрашувда жамоатчилик вакиллари номидан вилоят “Нуроний” жамғармаси раиси, сенатор Икромхон Нажмиддинов сўзга чиқиб, ушбу лойиҳа халқ бирдамлиги ва бунёдкорлик салоҳиятининг ёрқин намунаси эканини таъкидлади.

Маълумотларга кўра, сўнгги йилларда Наманганда гулчилик маданияти жадал ривожланмоқда. Агар 2018 йилда 4,5 миллион туп гул экилган бўлса, бугунги кунда 120 турдаги 150 миллиондан ортиқ гул кўчатларини экиш режалаштирилган. Бу нафақат шаҳарнинг эстетик қиёфасини яхшилаш, балки унинг инвестицион ва туристик жозибадорлигини оширишга ҳам хизмат қилмоқда.

Жорий йилда 65-халқаро гуллар фестивали 24 майдан 12 июлга қадар ўтказилиши режалаштирилган. Фестиваль давомида 150 дан ортиқ маданий-маърифий тадбирлар, халқаро форумлар, кўргазмалар ва концерт дастурлари ташкил этилади.

Тантанали маросимнинг энг ҳаяжонли қисмида барча иштирокчилар биргаликда рекорд ўрнатиш жараёнига рамзий старт беришди. Бу ташаббус нафақат дунё рекордини янгилашга, балки Наманганнинг халқаро имижини мустаҳкамлаш, экологик муҳитни яхшилаш ва аҳоли ўртасида бунёдкорлик руҳини янада кучайтиришга хизмат қилиши кутилмоқда.