ТОШКЕНТ, 28 апрель. /“Дунё” АА/. Бугун “CAEx Uzbekistan” мажмуасида гўзаллик, косметология ва парфюмерия-косметика саноатининг “Beauty Uzbekistan 2026” ихтисослаштирилган халқаро кўргазмаси ўз ишини бошлади, деб хабар бермоқда “Дунё” АА мухбири.

Кўргазма 28–30 апрель кунлари бўлиб ўтади ва ишлаб чиқарувчилар, дистрибьюторлар ва гўзаллик саноатининг профессионал ҳамжамиятини бирлаштирувчи асосий B2B форматдаги платформа ҳисобланади. Кўргазма соҳанинг косметика маҳсулотлари, ингредиентлар, биотехнологиялар, қадоқлаш ечимлари ва профессионал хизматларни ўз ичига олган инновацион экотизимга айланишини акс эттиради.

Бу галги тадбирда Италия, Испания, Корея Республикаси, Хитой, БАА, Швейцария ва бошқа 15 мамлакатдан юздан ортиқ компания ва брендлар иштирок этмоқда. Бош ҳомий – Россиянинг “BIOGEL” компанияси.

2026 йилда кўргазма кўлами сезиларли даражада кенгайди –майдон 55 фоизга кенгайтирилди. Бу халқаро қизиқишнинг ортиб бораётгани ва лойиҳанинг мавқеи мустаҳкамланаётганидан далолат беради. Корея Республикаси ва Польша миллий павильонлари, Латвия компанияларининг жамоавий экспозицияси намойиш этилмоқда.

Экспозиция иккита асосий йўналишни қамраб олади: парфюмерия ва косметика маҳсулотлари, жумладан профессионал ва уй парвариши, эстетик тиббиёт, аппарат косметологияси ва қаришга қарши технологиялар сегменти.

Шу билан бирга, халқаро экспертлар иштирокида мавзу юзасидан турли сессиялар, маҳорат дарслари ва тақдимотларни ўз ичига олган ишбилармонлик дастури ўтказилмоқда. Гўзаллик саноатида илмий ёндашувлар, бальнеологик технологияларни ривожлантириш ва инновацион ечимларни жорий этишга алоҳида эътибор қаратилди.

Кўргазма доирасида илк бор бозор иштирокчилари ўртасида ишбилармонлик алоқаларини ривожлантириш ва ҳамкорлик алоқаларини ўрнатишга қаратилган ихтисослаштирилган B2B шаклида “Matchmaking” платформаси ташкил этилди. Унда халқаро делегациялар, жумладан, Франциянинг “Cosmetic Valley” уюшмаси вакиллари иштирок этмоқда.

“Beauty Uzbekistan 2026” кўргазмаси аллақачон мутахассислар орасида катта қизиқиш уйғотди ва гўзаллик саноатини ривожлантириш ҳамда халқаро ҳамкорлик учун асосий майдон сифатидаги ролини мустаҳкамлашда давом этмоқда.