ИСЛОМОБОД, 26 март. /“Дунё” АА/. Покиcтоннинг марказий “Daily Financial Times” ва “The Daily Morning News” газеталарида Ўзбекистондаги Ислом цивилизацияси марказининг очилишига бағишланган мақолалар эълон қилинди, деб хабар қилмоқда “Дунё” АА мухбири.

Нашрларда ёзилишича, 2025 йил 29 январь куни Президент Шавкат Мирзиёев Ўзбекистондаги Ислом цивилизацияси марказига ташрифи давомида, икки мингдан ортиқ маҳаллий ва хорижий олимлар томонидан ишлаб чиқилган илмий-инновацион лойиҳалардан марказ экспозицияларида фойдаланиш бўйича қатор тавсия ва топшириқлар берган эди.

“Бу чинакам тарихий ташриф бўлди. Ўтган бир йил давомида марказ биноси тўлиқ қуриб битказилди. Марказ фаолиятини такомиллаштириш ва унинг мазмунини бойитиш ишларига 40 дан ортиқ мамлакатдан мутахассислар ва дизайнерлар жалб этилди. Уларнинг барчаси Президент ташаббуси ва ғоялари билан яратилган мегалойиҳа атрофида бирлашди”, дея фикр юритилган материалда.

Газеталарда таъкидланганидек, Ўзбекистон Президенти 2025 йил сентябрь ойида БМТнинг юксак минбаридан туриб, Ўзбекистондаги Ислом цивилизацияси маркази қуриб битказилгани ва тез орада очилишини маълум қилган эди. Ўтган давр мобайнида экспозицияларнинг ички мазмуни янада бойитилди.

Мақолаларда қатор давлат раҳбарининг Ўзбекистондаги Ислом цивилизацияси марказига ташрифи давомига олган таассуротлари покистонлик муштарийлар эътиборига тақдим этилган.

“Ўзбекистон Президенти ташаббуси билан ташкил этилган Ислом цивилизацияси марказида бўлиб, мамлакат раҳбариятининг ўзбек халқининг бой маданий ва маънавий қадриятларини асраб-авайлаш ва тарғиб қилишга содиқлигига яна бир бор ишонч ҳосил қилдик. Исломофобия кучайиб бораётган бир шароитда Марказнинг очилиши алоҳида аҳамият касб этади. У исломнинг бунёдкорлик, инсонпарварлик, бағрикенглик, дўстлик ва биродарлик дини эканини яққол намоён этади”, – дея Озарбайжон Президенти Илҳом Алиев фикрларидан иқтибос келтирган босма нашрлар.

Мутахассислар ва сиёсатчилар якдиллик билан ушбу лойиҳа радикализм ва исломнинг бузилган қиёфасига қарши гуманитар қалқон бўлганини таъкидламоқда.

Марказ фаолияти учун маданий меросни қайтариш алоҳида аҳамиятга эга. Президент топшириғига биноан махсус давлат ва дипломатик механизмлар яратилди, бу эса дунёдаги энг йирик кимошди савдо уйлари – “Sotheby’s”, “Christie’s”, “Bonhams” ва бошқа етакчи музейлар ва хусусий коллекционерлар билан тизимли ҳамкорликни йўлга қўйиш имконини берди. Натижада, икки мингга яқин ноёб осори-атиқалар, жумладан, Ибн Сино қўлёзмалари, Беруний асарлари, Темурийлар даври миниатюралари, ислом санъати дурдоналари юртимизга қайтарилди.