АНҚАРА, 17 январь. /“Дунё” АА/. Ўзбекистон элчиси Илҳом Ҳайдаров Туркия Буюк миллат мажлиси Ташқи алоқалар қўмитаси раиси Фуат Октай билан учрашди, деб хабар бермоқда “Дунё” АА мухбири.

Музокаралар чоғида икки қардош мамлакат ўртасидаги ҳар томонлама стратегик шериклик доирасида барча йўналишларда, шу жумладан парламентлараро ҳамкорлик соҳасида салмоқли натижаларга эришилгани қайд этилди.

Ўтган йил давомида Туркия Буюк миллат мажлиси раисининг Ўзбекистонга амалга оширган икки ташрифи, шу билан бирга, Ўзбекистон Олий Мажлиси Сенати раисининг Туркияга ташрифи соҳадаги ҳамкорлик юксак даражада эканини яққол кўрсатаётгани таъкидланди.

Учрашувда икки мамлакат ўртасидаги савдо-иқтисодий алоқалар изчил ўсиб бораётганига алоҳида эътибор қаратилди. Маълум қилинишича, 2025 йил якунларига кўра, Туркия Ўзбекистондаги хорижий инвесторлар орасида учинчи ўринни эгаллаган.

Ўтган йил мобайнида Туркиядан Ўзбекистонга 170 мингга яқин сайёҳ ташриф буюрган бўлиб, бу ўз навабатида Туркия фуқароларининг тарихий ватанига бўлган қизиқиши ортиб бораётганидан далолат беради.

Фуат Октай Туркий давлатлар ташкилоти доирасида парламентлараро мулоқот фаол ривожланаётгани, аъзо давлатлар парламентларининг халқаро ишлар бўйича қўмиталари йиғилишлари бу ҳамкорликни мустаҳкамлашда муҳим ўрин тутаётганини билдирди.

Суҳбат якунида томонлар икки ва кўп томонлама парламентлараро алоқаларни янада мустаҳкамлаш, мунтазам мулоқот олиб бориш юзасидан келишиб олди.