ЛОНДОН, 1 май /“Дунё” АА/. Мамлакатимизнинг Буюк Британиядаги элчихонаси Кинематография агентлиги билан ҳамкорликда “Улуғ Амир ва Донна Мария” фильмининг илк катта тақдимотини ўтказди, деб хабар қилмоқда “Дунё” АА мухбири.

Ўзбек киноижодкорлари томонидан суратга олинган ушбу бадиий фильм премьераси Амир Темур таваллудининг 690 йиллиги муносабати билан ташкил этилди.

Премьера Лондондаги энг нуфузли ва тарихий кино масканларидан бири – “Regent Street Cinema” кинотеатрида намойиш этилди. 1848 йилда ташкил этилган “Regent Street Cinema” тарихий кинозал бўлиб, дунёдаги энг қадимги кинотеатрлардан бири ҳисобланади.

Кинотеатрда Буюк Британияда илк ҳаракатланувчи тасвирлар (фильм) биринчи бор намойиш этилган. Бугунги кунда бу маскан нафақат кино намойишлари, балки маданий ва тарихий тадбирлар учун ҳам муҳим марказ вазифасини бажаради.

Кино намойишида Британиянинг турли вазирлик ва идоралари масъуллари, мамлакатдаги дипломатик корпус вакиллари, илмий-академик доиралар, эксперт-таҳлилчилар, санъатшунослар, “Эл-юрт умиди” жамғармаси стипендиатлари ва ватандошлар қатнашди.

Тақдимотда кино ижодкорлари фильмнинг яратилиши, унинг тарихий воқеалари, ғоявий мазмуни, Амир Темурнинг Европа мамлакатлари билан дипломатик алоқалари, адолат ва инсонпарварлик ғоялари ҳақида маълумот берди.

Премьера Ўзбекистон киносанъатини халқаро майдонда тарғиб этиш ва миллий меросни дунёга танитишда муҳим аҳамият касб этгани эътироф этилди.

Хорижлик экспертлар Ўзбекистонда барча соҳаларда олиб борилаётган кенг кўламли ислоҳотлар, жумладан маданият ва санъатни ривожлантириш, ўзбек тилининг нуфузини янада ошириш, улуғ аждодларнинг илмий-ижодий меросини ўрганиш ва уларни халқаро ҳамжамиятга танитиш йўналишларида амалга оширилаётган саъй-ҳаракатларни юксак баҳолади.

“Улуғ Амир ва Донна Мария” фильми сценарий муаллифи – таниқли ёзувчи Хайриддин Султонов, режиссёри – Ёлқин Тўйчиев, бош роль ижрочиси – актриса Жессика Мей (Донна Мария).

Фильм премьераси лондонликларда катта таассурот қолдирди. Улар бундай кинокартина тақдимотлари тез-тез ўтказилишини алоҳида таъкидлади.