ЛОНДОН, 28 апрель. /“Дунё” АА/. Бугун Ўзбекистон элчихонасида буюк саркарда ва давлат арбоби Соҳибқирон Амир Темур таваллудининг 690 йиллигига бағишланган халқаро илмий-маданий форум бўлиб ўтади, деб хабар бермоқда “Дунё” АА мухбири.

Апрель ойида Тошкент ва Самарқанд шаҳарларида Амир Темур ва Темурийлар цивилизациясининг жаҳон тарихи ва маданиятидаги ўрни ва аҳамиятига бағишланган халқаро илмий-амалий конференция бўлиб ўтди.

Мадрид шаҳрида олимлар, экспертлар ва дипломатик корпус вакиллари иштирокида ўтказилган халқаро тадбир дастурининг навбатдаги босқичи бўлди. Лондонда Амир Темур ва Темурийлар мероси бўйича ташкил этиладиган тадбир эса кенг кўламли тантаналарнинг муҳим давоми бўлади.

Режалаштирилган форум Шарқ ва Ғарб ўртасидаги кўп асрлик интеллектуал ва маданий мулоқотнинг давомийлигини таъминлаши кўзда тутилган.

Маданий учрашув дастурида миллий ва халқаро илмий доиралар вакиллари, етакчи экспертлар, халқаро ташкилотлар ва ҳамкор тузилмалар мутахассислари Амир Темур ҳаёти ва фаолияти ҳақида турли тақдимотлар намойиш қилиши режалаштирилган.

ЕХҲТ, Буюк Британиянинг тегишли ҳуқуқни муҳофаза қилиш идоралари вакиллари иштирокидаги муҳокамалар давомида маданий меросни асраб-авайлаш борасида фикр алмашилади. Шу билан бирга, тарихий бойликларнинг ноқонуний айланишига қарши курашиш, ҳуқуқий ҳамкорлик механизмларини мустаҳкамлаш ва жаҳон цивилизацияси ёдгорликларини сақлаш йўналишидаги халқаро ҳамкорлик масалалари муҳокама қилинади.

“Лондонда ўтказилиши режалаштирилган форумнинг асосий воқеаси “Ноқонуний олиб чиқилган маданий бойликларни Ўзбекистондаги Ислом цивилизацияси марказига тантанали топшириш” маросими бўлади. Ушбу акция жаҳон ҳамжамияти Ўзбекистон Президентининг мамлакатимиз тарихига оид қатор ноёб осори-атиқаларни Ватанга қайтариш бўйича олиб бораётган сиёсатини қўллаб-қувватлаётганининг муҳим тасдиғидир”, дейди Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти (WOSCU) бошқаруви раиси Фирдавс Абдухолиқов.

Шунингдек, тадбир доирасида “Ўзбекистон маданий мероси жаҳон тўпламларида” туркумидаги WOSCUнинг “Марказий Осиё қўлёзма мероси Кембриж университети кутубхоналарида” номли янги фундаментал нашри тақдимоти бўлиб ўтади. Ушбу асар устида доктор Фируза Мелвилл ўзбекистонлик мутахассислар билан биргаликда уч йил давомида иш олиб борган.

Форумнинг Лондонда ўтказилиши буюк Темурийлар мероси замонавий дунё халқлари, мамлакатлари ва илмий мактабларини бирлаштиришда давом этаётганининг яна бир тасдиғи бўлади.