МОСКВА, 16 март. /“Дунё” АА/. Мамлакатимизнинг Россиядаги элчихонаси консуллик бўлимига ушбу давлатда меҳнат қилаётган ватандошимиз ёрдам сўраб мурожаат қилди, деб хабар бермоқда “Дунё” АА мухбири.

Мурожаатчининг маълум қилишича, унинг вояга етмаган қариндоши қўлга олиниб, Москвадаги вояга етмаганлар учун мўлжалланган ижтимоий реабилитация марказларидан бирига жойлаштирилган.

Консуллик бўлими вакиллари ушбу ҳолат бўйича зудлик билан ишга киришиб, тегишли ташкилотлар билан боғланган. Дипломатларимиз мушкул вазиятга тушиб қолган ҳамюртимизнинг муаммосини ҳал этиш мақсадида вояга етмаганлар учун мўлжалланган ижтимоий реабилитация маркази маъмурияти ҳамда Россиянинг бошқа ваколатли органлари билан ҳамкорлик алоқаларини амалга оширган.

Ўз вақтида кўрилган чора-тадбирлар, тегишли идоралар билан олиб борилган мувофиқлаштириш ишлари натижасида бола оиланинг ишончли вакилига топширилиб, соғ-саломат ватанга олиб қайтарилди.

Ўзбекистон элчихонаси Россия ҳудудидаги ватандошлар, жумладан, вояга етмаганларнинг ҳуқуқ ва қонуний манфаатларини ҳимоя қилиш масалаларига алоҳида эътибор қаратишда давом этмоқда.

Шу муносабат билан, элчихона ходимлари Россиядаги ватандошларни вояга етмаганларнинг хавфсизлиги ва уларга тўғри ғамхўрлик қилиш масалаларига алоҳида эътибор беришга ундайди. Шунингдек, вояга етмаганларни катталарсиз қолдирмасликка, мураккаб вазиятлар юзага келган тақдирда элчихона ва консуллик муассасаларига ўз вақтида мурожаат қилишга чақиради.