ДОХА, 14 март. /«Дунё» АА/. Жорий йил 13-14 март кунлари Ўзбекистон элчихонаси томонидан эвакуация қилинаётган фуқароларимизнинг сўнгги гуруҳи йўлга чиқди, деб хабар бермоқда «Дунё» АА мухбири.

Режалаштирилган маршрутга мувофиқ, 96 нафар фуқаро Доҳадан Дубайгача автобусларда йўл олиб, у ердан Дубай–Тошкент йўналиши бўйича самолётда парвоз қилишади.

Элчихона ходимлари фуқароларимизни олиб кетган автобусни чегарагача кузатиб боришди. Эвакуация қилинган юртдошларимиз кўрсатилган амалий ёрдам ва хавфсиз эвакуация жараёни самарали ташкил этилгани учун Ўзбекистон раҳбариятига, хориждаги дипломатик ваколатхоналарга ҳамда “Ватандошлар” жамоат фондига самимий миннатдорлик билдиришди.

Элчихона томонидан шу кунга қадар Қатарни тарк этиш истагини билдирган 548 нафар Ўзбекистон фуқароси “Ватандошлар” жамоат фонди билан ҳамкорликда Саудия Арабистони ва Бирлашган Араб Амирликлари орқали юртимизга эвакуация қилинди. Улар орасида асосан туристлар, талабалар ҳамда вақтинча меҳнат фаолияти билан шуғулланиш учун келган фуқаролар бор эди.

Жорий йилнинг 28 февраль куни Исроил ва АҚШ ўртасида Эрон билан қуролли тўқнашувлар бошлангани ортидан Қатар ўз ҳаво ҳудудини ёпди. Натижада Ҳамад халқаро аэропорти фаолияти вақтинча тўхтатилиб, 2 мингга яқин авиақатновлар бекор қилинди.