ЛОНДОН, 9 сентябрь. /"Дунё" АА/. Ўзбекистон элчиси Равшан Усманов Лондон Савдо-саноат палатаси президенти Майкл Майнелли ва "Fitch Ratings" агентлигининг суверен ва халқаро ташкилотлар рейтинги бўйича бошқарувчи директори Жеймс Лонгсдон билан музокаралар ўтказди, деб хабар қилмоқда "Дунё" АА мухбири.

Британия вакиллари, мулоқот аввалида  мамлакатимизда амалга оширилаётган ислоҳотлар натижасини ва икки томонлама муносабатларнинг бугунги ҳолатини юксак баҳолади.

Майкл Майнеллининг айтишича, Лондон Савдо-саноат палатасига 1881 йилда асос солинган. Мазкур ташкилот аъзо компанияларга тренинг, бозор маълумотлари, халқаро савдо ҳужжатлари, арбитраж ва ҳамкорлик имкониятларини ўз ичига олган бизнес хизматларини кўрсатади.

Учрашувда Лондон Савдо-саноат палатаси ва Ўзбекистон Савдо-саноат палатаси ҳамда мамлакатимиз компаниялари ўртасида ҳамкорлик ўрнатиш таклифи билдирилди.

Шунингдек, Ўзбекистоннинг суверен кредит рейтингини янада яхшилаш истиқболлари хусусида фикр алмашилди. "Fitch" томонидан Ўзбекистон суверен рейтингининг оширилиши республикада олиб борилаётган туб ислоҳотларнинг халқаро майдондаги эътирофи эканлиги таъкидланди.