КОЛКАТА, 3 декабрь. /"Дунё" АА/. Ўзбекистон элчиси Сардор Рустамбоев Ҳиндистоннинг Ғарбий Бенгалия штати бош котиби Манож Пант билан учрашди, деб хабар қилмоқда "Дунё" АА мухбири.

Мулоқот чоғида мамлакатимизда сўнгги йилларда ҳаётга тадбиқ этилаётган изчил ислоҳотларнинг натижалари, турли соҳаларда халқаро ҳамкорлик алоқаларини мустаҳкамлаш бўйича кўрилаётган саъй-ҳаракатлар ҳақида сўзлаб берилди. Жумладан, Ўзбекистон ва Ҳиндистон ҳудудлари ўртасида амалга оширилаётган яқин ҳамкорлик тажрибасига алоҳида тўхталиб ўтилди.

Манож Пант Ўзбекистондаги янгиланиш жараёнини катта қизиқиш билан кузатаётганини таъкидлаб, ҳудудлараро муносабатларни ривожлантириш истиқболларини қўллаб-қувватлади. Хусусан, мазкур штатда чарм-пойабзал, тўқимачилик, аюрведик тиббиёт каби тармоқлар ривож топганига эътибор қаратиб, ушбу йўналишларда шериклик алоқаларини ривожлантириш учун кенг имкониятлар мавжудлигини таъкидлади.

Учрашув доирасида тўқимачилик, тери-кўнчилик, фармацевтика, заргарлик, ахборот технологиялари, олий таълим, туризм каби соҳалардаги ҳамкорликни фаоллаштириш истиқболлари кўриб чиқилди, бошқа долзарб масалаларга эътибор қаратилди.